Ministru Justisa, Tiago Amaral Sarmento. Imajen Tatoli/Francisco Sony

DILI, 19 maiu 20222 (TATOLI)— Ministru Justisa (MJ), Tiago Amarál Sarmanto, hateten durante tinan 20 Resturasaun Indenpendensia Timor-Leste (20 maiu 2002 too 20 maiu 2022), dezenvolvimentu iha setór justisa hatudu progresu di’ak, maski hasoru hela difikuldade no obstakúlu balun.

Hahú tinan 2002 mai too 2022, ha’u bele dehan katak ita nian sistema judisiáriu hasoru obstakulu, hasoru laloran boot. Maske nune’e, ita enfreta hodi konsege ultrapasa ho esforsu tomak hosi Estadu tomak nian hanesan Parlamentu Nasionál, Governu no Autór Judisiáriu sira, atu alkasa no atu dezenvolve setór justisa atu kontinua firme hodi hatuur Estadu Demokrátiku,” Ministru Justisa (MJ), hateten ba Agência TATOLI iha nia knaar fatin Caicoli, tersa foin lalais ne’e.  

Notísia relevante:  Durante mandatu, MJ promete obriga investidór sira kumpre akordu arrendamentu

Tanba atu promove Estadu de Direitu no garante igualdade iha asesu justisa ba ema hotu, sai nafatin dezafiu boot ba Timor-Leste, nebé lori aspetu komplexu tebes. Máibé, konsolidasaun iha setór justisa sai hanesan baze importante no fundamental ba konstrusaun pás no konstrusaun Estadu. Nomós, fator krusial ida atu transmite konfiansa no atrai investimentu, ba dezenvolvimentu ekonomia nian.

Timor-Leste enfrenta dezafiu barak ne’ebé mosu husi kuadru kona-ba lejizlasaun ka lei sira ne’ebé defisiente no la adekuada ba realidade, kona-ba infraestrutura ne’ebé la sufisiente no kona-ba difikuldade iha kapasitasaun no kualifikasaun iha rekursu umanu, ne’e hotu hanesan kondisaun fundamental atu permite ema hotu hetan asesu ba justisa.

Iha kontestu istóriku ida, ne’ebé esplika didiak dezafiu balun iha setor ida ne’e, hodi destaka katak parte balun hosi profisional iha setor justisa laiha domíniu iha sistema legál, sistema ne’ebé inspiradu husi modelu portugués, nune’e mós, laiha domíniu plenu (ka diak) iha língua portugueza, nu’udar kondisaun esensiál tebes atu interpreta no aplika lei sira.

Frajilidade iha sistema justisa bele kria problema boot ba prosesu ‘konstrusaun Estadu’ ne’e rasik no mós ba dezenvolvimentu ekonómiku no sosial Nasaun nian. Sei la-iha konfiansa ba investimentu ekonómiku, bainhira laiha sistema judisiál ne’ebé asegura kumprimentu ba lei. No bainhira laiha investimentu, sei laiha servisu no se laiha servisu, sei laiha pás. Nune’e, maka tema ida ne’e tenke aborda, tuir duni respeitu ne’ebé nesesáriu ba instituisaun no tuir respeitu ba separasaun poder, maibé mós ho urjénsia no seriedade.

Iha tinan 2021, Prezidente Repúblika, Francisco Guterres Lú-Olo promulga ona Lei Organizsaun Judisiária hodi muda sistema judisiáriu ne’ebé maka harii iha tempu UNTAET hanesan Tribunál Rekursu ida no Tribunál Distritál iha fatin haat.  

“Lei organizasaun judisiariu foun ne’e, ita sei harii Supremu Tribunál ba Justisa ida, Tribunál Rekursu tolu, Tribunál Munisipál iha kada munisípiu ho ita nian rekursu,” nia akresenta.

Too tinan ne’e, Governu liuhosi Ministériu Justisa konsege prodús ona Juís na’in-35, Prokuradór 35, Defensór Públiku 30-resin ho Advogadu Privadu na’in-150 no mós sei iha tan formasaun ba hirak ne’ebé iha Sentru Formasaun juridika,” nia esplika.

Governante ne’e dehan nia parte rekoñese Tribunál Movél seidauk halo funsaun ho efetivamente tanba juíz sira ne’ebé atende hodi halo julgamentu iha Tribunál Movél númeru sei limitadu hela.

Iha tinan 2010, Tribunál Movél hahú halo nia knaar ho objetivu hakbesik justisa ba povu hodi fó atendimetu ba populasaun ne’ebé dook hosi Tribunál Distritál sira.

“Ida ne’e maka ita dehan, dada justisa besik liuba povu, nune’e VIII Governu Konstitusionál, iha nia programa ami tau kedan ida ne’e sai mós hanesan programa prioridade tanba povu bele sente justisa, julgamentu sira bele halo iha sira nia fatin,” nia afirma.

Governu liuhosi Ministru Justisa sei buka hakbiit no apoia Tribunál Movél atu fó justisa ba povu ho di’ak liután.

VIII Governu ida ne’e iha objetivu atu hahú reforma ne’ebé klean, iha instituisaun ida ne’e, hodi hatene katak reforma ne’e sei lori tempu, tanba ninia kompleksidade. Fiar katak kooperasaun institusional, iha prosesu ida ne’ebé inkluzivu, no iha apropriasaun hosi sira ne’ebé iha knaar atu foti desizaun nasionál, sei bele kontribui ba solusaun ba dezafiu ida ne’e, ka, ba iha konsolidasaun sistema de Justisa ida efikaz, iha ne’ebé prosesu, iha ne’ebé justisa sei aplika, sai prosesu ne’ebé lalais, ekilibradu, bele fó konfiansa, independentes no justus duni.

Hanesan parte ida mós husi nia objetivu prinsipál, maka Governu sei konsolida paz no demokrasia, hodi garante direitu, dever, liberdade no garantia fundamentál ba sidadaun tomak, introdúz reforma ida ne’ebé kle’an, iha setor justisa, hadi’a efisiénsia, efikásia no servisu lalais, iha ezersísiu no iha administrasaun justisa nian, promove setor judisiáriu ida ne’ebé profisionál, kompetente, independente no transparente.

Harii kuadru ida ba rekursu umanu, iha setor justisa, ne’ebé kompetente, independente, profisionál no esperiente, garante independénsia husi tribunal iha nia relasaun ho órgaun soberania sira seluk, promove no respeita direitu ba sidadaun hotu-hotu, inklui haluan asisténsia jurídika ba sidadaun ne’ebé vulnerávél sira no desprotejidu, liu-liu kona-ba asesu no kompriensaun sistema justisa nian rasik no  promove konfiansa ba sistema justisa, tantu husi povu tomak no mós husi sidadaun estranjeiru sira, ne’ebé inklui investidór sira.

Atu realiza objetivu hirak ne’e, nia dehan Governu sei implementa, tuir temátika setór oi-oin, hanesan iha planu dezenvolvimentu institusionál, sei konsolida administrasaun justisa, liuhusi melloria iha kapasidade institusionál no koordenasaun, reforma ba kuadru legál.

Alende ne’e, hala’o konsolidasaun no armonizasaun ba kuadru legál sira tomak iha sistema justisa no área direitu, dezenvolvimentu rekursu umanu nian, krusiál tebes ba setor ida, ho nia knaar ne’ebé fundamentál tebes iha prosesu harí Estadu no harí Nasaun no nesesidade ba infrastrutura ne’ebé adekuada iha setór Ida ne’e, relasiona ho asesu ba justisa, sei fomenta aprosimasaun husi justisa ba sidadaun sira.

Ikus liu, matéria ida ne’ebé transversál ba instituisaun tomak iha setór justisa, maka boa governasaun, tanba só ho ida ne’e, maka bele mosu dezempeñu di’ak iha justisa, ne’ebé sei benefisia ema hotu.

Notísia relevante:  MJ sei dezenvolve setór justisa iha área rekursu umanu

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here