Ministru Justisa, Tiago Amaral Sarmento. Imajen Tatoli/Francisco Sony

DILI, 07 abríl 2022 (TATOLI)— Ministru Justisa (MJ), Tiago Amaral Sarmento, hateten maske nia mandatu hela tinan-ida ho balun de’it, maibé esforsu hodi rezolve problema arrendamentu rai Estadu, nune’e obriga investor internasionál no nasionál sira ne’ebé utuliza rai Estadu  kumpre halo pagamentu.  

“Ha’u esforsu aan hodi rezolve kestaun arrendamentu rai Estadu hodi husu  ba investór rai li’ur no rai laran ka kompañia internasionál no nasional sira ne’ebé halo investimentu iha Timor- Leste, tenke kumpri lei hodi selu arrendamentu rai nian ba Estadu,” Ministru Justisa ne’e hateten ba jornalista sira iha nia knaar fatin-Caicoli, kinta ne’e.

Notísia relevante: Tempu besik, MJ formaliza akordu arrendamentu ho empreza ENSUL

Governante ne’e dehan iha kompañia no investór balun halo kontratu investimentu ho Governu ho durasaun tinan lima too tinan 30, maibé la selu arrendamentu ba Estadu.

“Ita buka atu rezolve, iha semana kotuk ha’u halo ona enkontru ho investór balun no sei kontinua hodi buka atu obriga sira selu arrendamentu,” nia afirma.

Nune’e, Nia husu ba husu ba investór sira ne’ebé iha ona akordu investimentu ho Governu Timor-Leste atu labele faan ka fó aluga tan rai ba ema seluk, tanba ne’e  komete krime no sei prosesa tuir dalan legal.

Governante ne’e mós  afirma iha tempu badak MJ sei aprezenta Dekretu-Lei  kona-ba kadástru ba  iha Konsellu Ministru atu hetan aprovasaun.

“Ha’u sei lori ba Konsellu Ministru, atu aprova dekretu-lei ne’e no Prezidente Repúblika promulga mak sidadaun timoroan hotu bele hetan ona sertifikadu propriade perfeitu (sertifikat hak milik). Ha’u espera katak antes ha’u nia mandatu ramata sertifikadu  propriade perfeitu sei fahe ba timoroan sira, atu nune’e sertifikadu bele garante sira nian vida,” Ministru Justisa ne’e kompromete.

Tanba Dekretu-Lei ne’e mak ekipa Servisu Diresaun Nassionál Kadástru hosi Ministériu Justisa nian bele tun ba sukat komunidade nia rai privadu sira, nune’e atribui sertifikadu.

Ministru Justisa (MJ), mós  hala’o reuniaun dahuluk ho Prezidente ENSUL engenharia, Alexandre Marques Couto, hodi ko’alia kona-bá konstrusaun Dili Financial Business Center (DFBC), ne’ebé konstrui iha rai Estadu.

Iha enkontru dahuluk ne’e, Governu Timor-Leste hakarak formaliza akordu arrendamentu ho ENSUL Engenharia, nune’e investimentu liuliu konstrusaun DFBC bele iha garante liuhosi selu arrendamentu ba kofre Estadu.

Tuir dadus hosi Sekretaria Estadu Terra no Priopriedade (SETP) hatudu iha tinan 2019 to’o 2020, Srekolla reseita hamutuk millaun $4,2 no tinan 2021 rekolla millaun $1,2. Enkuantu iha tinan 2017 to’o 2018 rekolla millaun $2-resin.

SETP rekolla hosi arrendamentu rai Estadu hosi instituisaun privadu no pesoál privadu, ne’ebé mak utiliza rai Estadu no halo kontratu ho Estadu.

Tuir dadus ne’ebé publika antes ne’e, sidadaun ne’ebé okupa patrimoniu Estadu hanesan edifísiu no rai Estadu hodi halo negósiu hamutuk 1.114, ne’ebé ninia presu selu sei haree ba klasifiksaun no poténsia rai, uza hela ka halo negósiu, nia presu sei la hanesan.

Alende ne’e, rejista 8.340 arrendatáriu iha territóriu ne’ebé mak halo kontratu utiliza patrimóniu Estadu no selu kada fulan.

Enkuantu, arrendatáriu hamutuk 4.115 maka selu ativu, maibé 4.225 mak la kumpre selu areendamentu desde 2017 to’o 2020.

Tuir Lei númeru 1/2003 no dekretu lei númeru 19/2004 ne’ebé ko’alia kona-ba propriedade Estadu no kobra arrendamentu. 

Notísia relevante: SETP rekolla millaun $4,2 durante tinan-ida hosi arrendamentu rai Estadu

Jornalista: Natalino Costa

Editora    :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here