Ekipa saneamentu sira raut hela foer iha Kapital Dili. Imajen Tatoli/Antonio Goncalves.

DILI, 19 maiu 2022 (TATOLI)—Governu liuhosi Autoridade Munisípiu Dili (AMD) rekruta ona pesoál 34 hosi komunidade postu Administrativu Cristo Rei hodi hamoos lixu sira-ne’ebé namkari iha jardin sira iha kapitál Dili, sai sidade ne’ebé moos no furak iha ema nia matan.

Notísia Relevante2022: AMD sei rekruta pesoál hamoos no seguransa jardin 200-resin

“Ita-nia Governu liuhosi Autoridade Munisípiu Dili rekruta pesoál limpeza hamutuk 34 hosi komunidade Cristo Rei ne’ebé sira sei hamoos jardin iha kapitál Dili,” Administradór Cristo Rei, Munisípiu Dili, Venancio Tavares, hateten ba jornalista Ajénsia Tatoli, iha nia knar fatin, Dili, kinta ne’e.

Rekrutamentu ne’e ba Limpeza Sidade Dili, liu-liu ba jardin sira, iha Cristo Rei, Tasi ibun BJ Habibie no sira hamoos mós esgotu sira-ne’ebé foer nakonu.

“Ekipa ne’e ha’u fahe ba tolu (3), ida kontrolu esgotu ne’ebé iha estrada ninin, ekipa ida servisu tuir tasi ibun hosi BJ Habibie to’o Cristo Rei no ekipa ida sira permanente iha Cristo Rei, oinsá atu haree maluk sira-ne’ebá so’e foer arbiru,” nia dehan.

Kona-ba kontratu ho durasaun no orsamentu totál hira, Venancio Tavares, lakohi fó komentáriu, tanba nia laiha informasaun.

Pesoál Limpeza iha Cristo Rei, Cancio da Silva, hateten sira ne’ebé Governu liuhosi Autoridade Munisípiu Dili (AMD), kontratu ne’e iha ekipa tolu (3) ne’ebé sira hamoos baleta iha Cristo Rei no Jardin Prezidente B.J Habibie nian.

“Ami-nia kontratu ne’e hanesan, hotu-hotu asina kontratu to’o fulan sia (9). Ne’ebé, servisu ne’e ami hahú ona iha 01 abril tinan ne’e, to’o determinasaun hosi kontratu fulan sia-ne’e. Iha kontratu ne’e hakerek iha ne’ebá katak fulan ida simu saláriu ho totál $115 ba pesoál sira hotu,” nia dehan.

Tuir nia, saláriu ne’e uza ba nesesidade loro-loron nian hamutuk ho família la to’o, tanba sasán folin sira agora sa’e makaas maibé pesoál saneamentu simu ho realidade ne’ebé mak iha.

Tanba, nia daudaun, daudaun ne’e nia iha oan hamutuk nain haat (4), ne’ebé mak forma hotu familia ona, nune’e nia servisu ne’e hodi haree ba nia familia sira.

PAM Díli husu komunidade koopera hamoos lixu

Entretantu, atu komemora loron restaurasaun independénsia Timor-Leste ba dala-XX (20 maiu 2002-20 maiu 2022), Prezidente Autoridade Munisipiu (PAM) Dili, husu komunidade koopera ho Governu hamoos lixu iha kapitál Dili.

Notísia RelevanteSelebra 20 maiu: pesoál saneamentu 128 hamoos Dili sai sidade moos

Nia hatutan, Autoridade Munisípiu Dili (AMD) esforsu hala’o daudaun hosi kamioneta 50 ne’ebé iha atu aumenta tan kamioneta 12 maibé la konsega, entaun AMD servisu nafatin no ekipa saneamentu buka tuir no hala’o nafatin rekolla lixu iha Dili laran,

“Tanba ne’e, hanesan Prezidente Autoridade Munisípiu dili hakarak husu ba komunidade koopera hamutuk ho Governu, liu-liu Autoridade Munisípiu Dili tanba PAM Dili hala’o dadauk ona edukasaun sívika no fahe daudaun pamfletu ba sira, atu bele haree hodi komemora XX anós Restaurasaun Independensia,” Guilhermina Filomena Saldanha Ribeiro hateten ba Agência Tatoli, iha nia knaar fatin, Dili, kinta ne’e.

Xefe Departamentu Saneamentu Munisípiu Dili, Domingos Soriano, informa pesoál saneamentu ne’ebé hamoos kapitál Dili hamutuk 128 ne’ebé rekolla lixu iha Jardin Largo Lecidere, Motael, Colmera, Comoro, Pantai Kelapa, Balíde, Audian, Formosa no Becora hodi sai sidade ne’ebé moos.

“Ita atu komemora loron restaurasaun independénsia Timor-Leste ba dala-XX (20 maiu 2002-20 maiu 2022), pesoál saneamentu iha kapitál Dili hamutuk 128, mak sei hamoos sidade Dili sai kapitál ne’ebé moos no furak,” nia dehan.

Tuir nia, sidade Dili nakonu ho lixu, ida-ne’e la’ós Governu lakohi esforsu an atu hamoos maibé ne’e depende ba komunidade, liu-liu negósiante ambulante sira-nia konsiénsia so’e lixu ne’e seidauk tau iha fatin lixu ne’ebé Governu prepara ona iha kapitál Dili.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here