Ekipa saneamentu rekolla hela lixu iha Kapitál Dili. Imajen Tatoli/Antonio Gonçalves.

DILI, 05 maiu 2022 (TATOLI)—Xefe Departamentu Saneamentu Munisípiu Dili, Domingos Soriano, informa pesoál saneamentu ne’ebé hamoos kapitál Dili hamutuk 128 ne’ebé mak sei hamoos lixu iha Largo Lecidere, Motael, Colmera, Comoro, Pantai Kelapa, Balíde, Audian, Formosa no Becora, sai sidade ne’ebé moos.

“Atu komemora loron restaurasaun independénsia Timor-Leste ba dala-XX (20 maiu 2002-20 maiu 2022), pesoál saneamentu iha kapitál Dili hamutuk 128 mak sei hamoos sidade Dili sai kapitál ne’ebé moos no furak,” Domingos Soriano hateten ba Agência Taoli, iha nia knar fatin, kinta ne’e.

Xefe Departamentu Saneamentu Munisípiu Dili ne’e hateten, sidade Dili nakonu ho lixu, ida-ne’e la’ós Governu lakohi esforsu an atu hamoos maibé ne’e depende ba komunidade liu-liu negosiante ambulante sira-nia konsiénsia so’e lixu ne’e seidauk tau iha fatin lixu.

“Tuir ami-nia observasaun durante ne’e, ita-nia negósiante sira faan ne’e mak atu estraga ita-nia sidade. Ezemplu, iha jardin Igreja Motael oin, haree ita-nia maluk sira ne’ebé faan nuu, han nuu kulit ba lekar arbiru. Alende ne’e, ita-nia maluk ba refresin, sira han so’e foer la tuir nia fatin, halo jardin ne’e nakonu ho lixu. Maibé, ami mós la taka matan dehan labele hamoos,” nia dehan.

Tanba ne’e, iha semana ne’e nia laran to’o 18 maiu, ekipa saneamentu Dili esforsu an atu hamoos sidade Dili ne’e bele redús hosi fo’er, maibé atu moos hosi fo’er ne’e defisil, tanba ne’e depende ba komunidade nia konsiénsia tanba ho sira-nia atividade barak halo sira la asegura sira-nia lixu, to’o ikus haree sidade Dili fo’er nafatin.

Iha área Motael, pesoál saneamentu hamoos ona maibé seida’uk hotu no iha Jardin Largo Lecidere ne’e pesoál saneamentu hosi postu Nain Feto mak hamoos no iha Cristo Rei mós pesoál saneamentu hosi postu administrativu Cristo Rei mak tun ba hamoos.

Iha área Tasi Tolu ni’an, ipesoal saneamentu hahú halo limpeza iha horbainrua no horisehik, maibé seida’uk hotu tanba lixu barak demais no presiza rua no tolu tan, tanba buat hotu depende ba komunidade nia kosniénsia atu soe lixu iha fatin lixu ka lae.

Tanba, nia dehan, iha kapitál Dili ne’e ema-ne’ebé so’e lixu mak barak liu fali pesoál saneamentu sira-ne’ebé hamoos lixu loro-loron.

Dirasaun Saneamentu Munisípiu Dili observa, karik komunidade iha kapitál Dili mak ho konsiénsia hola parte ona iha servisu halo limpeza no hamoos lixu hodi labele so’e foer arbiru, entaun sidade Dili ne’e bele sai sidade ne’ebé moos no nabilan.

“Maibé, agora ita haree haree aat liu. Governu bele hasai rezolusaun no sirkulár liuhosi mídia atu labele soe arbiru maibé komunidade nia konsiénsia mínimu liu,” nia dehan.

Liuhosi rezolusaun ne’e sei fó sansaun ba komunidade ne’ebé viola regra maibé to’o agora seida’uk aplika iha terrenu, tanba se aplika bele akontese sé mak so’e foer arbiru ne’e nia tenke hetan sansaun maibé to’o agora ida-ne’e seida’uk implementa.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here