Diretór Ezekutivu Asian Justice and Rights (AJAR), José Luis Oliveira. Imajen Tatoli/Francisco Sony

DILI, 19 maiu 2022 (TATOLI)—Diretór Ezekutivu Asia Justice and Right (AJAR), José Luis de Oliveira, hateten AJAR fó formasaun kona-ba transformsaun atetude ba Organizasaun Naun Govermentál (ONG) sira-ne’ebé mak servisu hamutuk ho AJAR.

Notísia Relevante: AJAR rekomenda SEII dezenvolve asuntu jéneru iha ministériu hotu-hotu

“Ami-nia projetu ne’e atu hametin kapasidade Organizasaun sira-nian, hodi ita fó formasaun ba ita-nia membru Organizasaun Naun Governamentál depois fó organizasaun mak sei fó fali ba ita-nia komunidade iha terrenu kona-ba enkuadramentu legál, no formasaun kona-ba transformasaun atetude,” José Luis Oliveira hateten ba Agência TATOLI, iha nia knar fatin Palpasu, Dili, tersa (12/05) ne’e.

Transformasaun atetude ne’e, AJAR elabora ba kestaun valór barlake nian ne’ebé manifesta hosi estrutura no relijiozu tanba dala ruma konserva violénsia, tanba sira-nia doutrina, advokasia no halo peskiza asaun partisipatóriu atu oinsá hanorin kona-ba peskiza.

“Maibé peskiza ne’ebé ami halo la’ós konvensionál tanba konvensionál mak daudaun ita halo ona maibé peskiza asaun partisipatóriu mak involve komunidade ne’ebé sai sujeitu no objetu ba peskiza, liuhosi métodu ne’e mak ita enkoraja ema atu brani ko’alia sai saida mak nia enfrenta,” nia dehan.

Durante tinan ida nia laran, AJAR halo kapasitasaun ba sira hodi servisu kombate ba violénsia hasoru feto no labarik feto.

Nune’e, AJAR hakarak influénsia PNDS atu oinsá bele servisu hamutuk ho autoridade lokál hodi halo promosaun ba direitu feto no labarik feto, aleinde atividade fíziku nian nune’e mós halo peskiza iha suku sira.

“Ikus mak ami implementa projetu pilotu iha nível suku atu organizasaun koko halo buat ruma iha nível suku mak atividade direitu feto no dezenvolve mekanizmu proteje feto mak ami hakarak servisu hamutuk ho autoridade lokál mak liuhosi PNDS, maibé durante ne’e Governu eziste programa PNDS maibé atividade ne’e halai liu ba fíziku. Maibé liuhosi PNDS ami koko atu halo influénsia liuhosi PNDS atu promove feto no labarik feto kona-ba knar no lei kona-ba autoridade lokál sira,” nia hateten.

Projetu ida-ne’e presiza realiza tanba durante ne’e promosaun direitu feto no labarik feto iha de’it surat-tahan leten no iha de’it Dili nune’e mós laiha prátika ida.

“Ho ida-ne’e, ami hanoin atu halo tanba ita iha Planu Asaun Anual Kombate Violénsia Bazeia Jéneru (PAN KVBJ) ne’ebé eziste iha tinan 2017 maibé laiha prátika no paradu de’it iha dokumentu leten no iha rurál feto kontinua moris iha nakukun laran, no maneira ne’ebé solusiona problema ne’e nafatin uza maneira tradisionál entaun dala barak la a-favór ba feto sira,” nia dehan.

Tanba ida-ne’e mak AJAR servisu hamutuk ho organzasaun naun governamentál sira-ne’ebé mak durante kolabora ho AJAR, hodi kontinua fó treinamentu no hametin kapasidade organizasaun nian atu bele hala’o formasaun iha terrenu.

Formasaun ne’e, AJAR servisu hamutuk ho organizasaun naun governamentál neen (6) hanesan Forum Komunikasaun Feto Timor Lorosa’e (FOKUPERS, Organizasaun Naun Governmentál Asisténsia Legál ba Feto no Labarik (ALFELA), Rekuperasaun Psikososiál no Dezenvolvimentu iha Timor-Leste (PRADET), Fundasaun Coalition for diversity and action (CODIVA), Movimentu Feto Foinsa’e (MOFEE), Ra’es Hadomi Timor Oan (RHTO) no Organizasaun ne’ebé servisu iha Munisípiu Covalima, Bobonaro, Aileu, Ermera, Liquiça, Baucau no Viqueque inklui Rejiaun Administrativa Espesiál Oé-cusse Ambeno (RAEOA).

Notísia Relevante: Peskiza kona-ba violénsia hasoru feto, AJAR deskobre pontu importante 10

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here