Ilustrasaun. Imajen/Espesiál.

DILI, 14 maiu 2022 (TATOLI)—Diretór Ezekutivu Asia Justice and Rigths (AJAR), José Luis Oliveira, informa atu komemora loron restaurasaun indenpendénsia ba dala-XX ne’e AJAR halo peskiza kona-ba Impunidade no Violénsia Hasoru Feto iha suku 21 iha Timor-Leste.

Nia hatutan, peskiza ne’e hala’o hosi membru ONG konsórsoi liuhosi grupu diskusaun no entrevista sobrevivente feto hosi violénsia, xefe suku, xefe aldeia no konsellu suku hamutuk 754 ne’ebé kompostu hosi mane 361 no feto 396 (idade 16-70).

“Hosi peskiza ne’e ami deskobre pontu importanete 10 ne’ebé mak Governu bele konsidera iha ninia polítika hodi kombate violénsia hasoru feto no labarik feto iha Timor-Leste,” Diretór Ezekutivu AJAR ne’e hateten ba Agência TATOLI, iha nia knar fatin, Palpasu, Dili, tersa (10/05) ne’e.

Diretór Ezekutivu Asian Justice and Rights (AJAR), José Luis Oliveira. Imajen Tatoli/Francisco Sony.

Liuhosi peskiza ne’e, AJAR ne’ebé mak servisu barak liu iha haforsa movimentu feto no asuntu Direitu Umanu ne’ebé sei foka liu ba problema sosial sira no oinsá mak atu hafanu fali instituisaun relevante sira hanesan ONG ka Governu atu halo reflesaun ba sira-nia servisu durante tinan 20 nia laran ba asuntu Direitu Umanu no problema ka violénsia hasoru feto ne’ebé mak kontinua aas iha Timor-Leste.

Iha peskiza ne’e, AJAR deskobre pontu prinsipál 10 mak hanesan;

1) Legadu hosi violénsia pasadu, impunidade no estigma kontinua fó impaktu ba feto nian moris.

“Katak feto no labarik feto hetan ona violénsia ne’ebe kruel iha kada períodu kolonializmu estranjeiru no okupasaun militár iha istória Timor. Karáteristika komun ida iha kada era mak autór mane sira (malae ka Timor) la hetan konsekuénsia ba sira-nia hahalok no laiha autoridade autoridade Estadu ne’ebé husu sira-nia responsabilidade, nune’e sira kontinua goza impunidade tomak,” Diretór AJAR ne’e hateten.

2) Feto no Labarik Feto hetan esperiénsia violénsia oin-oin iha suku 21 hotu.

“Violénsia sira-ne’ebé mosu iha suku sira-ne’e mak violénsia fízika hasoru feto no labarik feto, violénsia psikolojiku, ekonomiku no violénsia estruturál ne’ebé to’o ikus bele hamosu violénsia domestika. Kazu violénsia doméstika sira a’as iha suku. Ne’e hatudu katak feto no mane seidauk konsidera hanesan liu-liu laen baku sira-nia feen sira tanba hemu lanu hodi la hanoin kona-ba sira-nia feen ka ekonómia uma-laran,” nia hateten.

3) Kauza problema sai tiha ona abut ne’ebé kle’an ona.

Iha deskobrimentu ne’e, haree liu ba diskrepansia estruturál tanba kultura patriarkál ne’ebe bazea ba dominiu mane; Hametin hosi kustume, kultura tradisionál hanesan barlake; Estatutu labarik feto no feto ne’ebe kiik iha família, no resaun ekonomia; Dezempregu no ki’ak; mane la responsabiliza ba labarik sira.

Ida-ne’e signifika diskrepansia estruturál katak kultura patriarkál ne’ebé bazea ba dominiu mane ne’ebé hametin hosi kustume, kultura tradisionál, berlake, izolamentu sosiál.

Iha izolamentu sosiál ne’e mak la asesu ba edukasaun saúde reprodutiva relasiona ho sexu no oinsá komunidade konsidera vitima violénsia seksuál; menus informasaun nomós atendimentu relasiona igualdade jéneru no violénsia baze aba jéneru (VBJ); kaben sedu; labarik feto sai hosi eskola.

4) Ninia impaktu bele sente loos, maibé invisivel hosi autoridade sira.

Maiória kazu trata iha nivel primeiru hosi xefe suku ka autoridade lokál no laiha relatóriu ne’ebe konsistente hosi kazu sira-ne’e ba nivel munisipál no nasionál. Ida-ne’e hamosu trauma entre jerasionál no lakon oportunidade atu hetan edukasaun.

Ida-ne’e akontese tanba laiha sasukat no kustu adekuadu hosi impaktu violensia:

  • Vitima no sobrevivente ne’ebe lakon, labarik oan-kiak;
  • Problema ba kustu saúde fiziku no mentál ne’ebé grave;
  • Opurtunidade moris ne’ebé atrazu; kona-ba moris família iha suku.
  • Feto lakon poténsia ekonomia atu kontribui ba família, suku no dezenvolvimentu nasional.

5) Padraun ba resposta–silénsiu no porteiros maskulinu tendénsia ba apatia.

Iha deskobrimentu ida-ne’e, feto no labarik feto barak ne’ebé hetan violénsia, la hakat ba oin atu fó hatene ba ema kona-ba asuntu ne’e ka hato’o keixa ba xefe suku ka ema seluk, maibé sira nonook no la hetan apoiu hodi buka justisa, hetan presaun hosi familia atu nonook tanba mantein “naran diak“ no tauk se ko’alia bele kauza violénsia ne’ebé boot.

Tanba, nia informa, polisia no sistema legál formál dook liuhosi suku no susar atu asesu. Feto senti sei la hetan rezultadu ne’ebe justu ho lori ninia kazu ba oin, tantu ho solusaun tradisionál liuhusi kustume nomós liuhosi meiu legál formal, tanba sistema rua ne’e domina hosi mane no posivel intimida

6) Lista naruk ba obstaklu atu rezolve no prevene Violénsia Bazeia Feto no Labarik Feto.

Istória naruk periodu violénsia ekstrem ba feto no labarik feto, ho impunidade ne’ebe kuaze perfeitu ba autór sira-ne’ebe dala-barak nu’udar ajente Estadu.

Durante siklu violénsia ne’e, ema halo norma oioin ne’ebé ta’ís hosi esperiénsia ema Timor ohin loron iha komunidade nia moris.

Nune’e, ema haree nu’udar alvu violénsia ne’ebé aseitavel; vítima violénsia seksuák hetan stigma; sosiedade toman ona haree violénsia seksuál no husik hela de’it; no trauma entre jenerasaun, estigma, marjinalizasaun no exkluzaun–sosiedade ne’ebé halo estigama sobrevivente labarik violénsia seksuál.

7) Inisiativa balun pozitivu iha nível suku.

Violénsia hasoru feto no labarik feto sira akontese tanba impaktu hosi lia fetosan-umane bainhira atu hafolin feto, tanba ne’e komunidade iha suku balun iha esforsu atu hamenus prátika barlake;

Mudansa maneira familia sira prátika eransa patrilineál hodi labarik feto sira mos hetan eransa; asesu ba edukasaun ne’ebé di’ak liu ba labarik feto; inan-aman servisu makaas atu kuida sira-nia oan feto iha eskola; feto bele partisipa liu iha foti desizaun iha uma-laran.

Mudansa ne’e akontese tanba: kresimentu knar feto nu’udar membru Konsellu Suku; programa edukasaun no sensibilizasaun Organizasaun Naun Governamentál iha suku sira komesa aumenta sira-nia konsiénsia ba direitu feto no labarik feto, no igualdade jeneru; edukasaun ba asisténsia legal; iha uma mahon; no klinika saúde movel ne’ebé trata violénsia ba feto no labarik feto.

8) Haburas impunidade, habelar violénsia.

Iha Timor-Leste kultura impunidade ne’e buras hodi hamoe vitíma to’o sai nonook; menus apoiu prátiku ba feto ida-ne’ebe buka tulun; autoridade lokál ne’ebé domina hosi mane posibilita atu komplika hodi hato’o keixa ba sira; no konviksaun privadu no sosiedade katak violensia fiziku hosi mane ba sira-nia feen justifika iha situasaun balun.

Nune’e, mosu impunidade iha Justisa mós buras tanba menus apoiu ba feto atu buka justisa, sátan momentu sira hakarak halo buat ne’e; menus konsiénsia iha feto sira kona-ba lei ne’ebe proteje sira, inklui lei kontra violénsia doméstika no sira-nia direitu no prosedura legal kona-ba oinsá atu hala’o; justisa iha suku, nivel defensór maskulinu; no laiha insentiva ekonomia ba ema buka justisa.

9) Presiza iha esforsu inovativu espesiál hodi kombate impunidade legál no kulturál kona-ba violénsia hasoru feto no labarik feto iha nível baze no sosiedade.

10) Iha potensiál importante hodi empodera sobrevivente, modelu komportamentu não-violento, relata no enkamiña ba suku.

Konsellu Suku barak mak la klaru kona-ba sira-nia mandatu no kompeténsia hodi envole-an iha programa no servisu sosiál kona-ba oinsá mak halo promosaun igualdade jéneru, prevensaun violénsia doméstika no apoiu ba sobrevivente hosi violénsia doméstika.

Programa inovadora no rekursu sira ba longu prazu persiza hala’o hodi implementa servisu no prevensaun sira ba to’o nivel suku.

Diretór AJAR ne’e haktuir, violénsia pasadu vítima hetan violénsia direitu umanu ka violasaun seksuál iha funu laran to’o agora sei terus tanba impunidade buras no laiha justisa ba autór sira.

Kazu konkretu akontese iha Suai-Covalima, milisia oho feto ida depois halai tiha ba Timor Osidentál depois repatriasaun nia mai Timor no kontinua integra livre iha nia komunidade.

“Entaun ho ida-ne’e vítima bainhira haree sente dezesperadu tanba justisa laiha tiha de’it, entaun feto sente laiha justisa ida ba sira no autór kontinua livre no sai hanesan impunidade ida,” nia hateten.

Hosi deskobrementu hirak-ne’e, nia dehan, AJAR halo atu entidade hotu-hotu atu oinsá kombate ba violénsia hasoru feto no labarik sira.

“Ami halo relatóriu ne’e ho intensaun atu prosesu ida hodi halo reflesaun ba entidade sira atu kombate ba feto no labarik feto mak rekomendaun ne’ebé mak hato’o barak liu ita presiza fó atensuan barak liu ba hametin kapasidade autoridade komunitária sira,” nia dehan.

Nia dehan, kazu hanesan ne’e nivel suku mak bele hatene no responde entaun sira presiza hatene lei kona-ba asuntu ne’e no ida-ne’e sai hanesan edukasaun ida ba sira.

“Entidade no organizasaun ne’ebé mak tau-matan ba asuntu ne’e tenke servisu hamutuk ho suku sira, nune’e estabelese no habelar infomasaun kona-ba mekanizmu sira-ne’ebé mak bele kumpre lei sira,” nia dehan.

AJAR deskobre pontu importante 10 ne’e liuhosi peskiza ne’ebé sira hala’o iha Rejiaun Administrtaiva Espesiál Oé-cusse Ambeno (RAEOA), Munisípiu Aileu, Ainaro, Baucau, Bobonaro, Dili, Ermera, Liquiça, Lautém no Viqueque.

Membru ONG konsóriu sira-ne’ebé hala’o peskiza mak Asia Justice and Rights (AJAR), Asisténsia Legal ba Feto no Labarik (ALFeLa), Asosiasaun Chega! Ba Ita (ACBIt), Asosiasaun Unidade Feto ba Dezenvolvimentu (AUFD), Centro Comunidade Covalima (CCC), Coalition on Diversity and Action (CODIVA), Forum Komunikasaun Ba Feto Timor Lorosa’e (FOKUPERS), Fundasaun Moris Foun (FMF), Hametin Asaun Dezenvolvimentu no Ekonomia Rural (HADEER), Hametin Demokrasia no Igualidade (HDI).

Institutu Mata-Dalan Integradu (IMI), Knua Haberan Comunidade (KHC), Mane Ho Visaun Foun (MHVF), Movimento Feto Foinsae Timor-Leste (MOFFE), NGO Forum Timor-Leste (FONGTiL), Organizasaun Haburas Moris (OHM), Psychosocial Recovery and Development in East Timor (PRADET), Raes Hadomi Timor Oan (RHTO), Rede Feto, Rural Youth Action (RYA) no Seloi Horticultura Produsaun.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here