Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa. Imajen/Tatoli.

Dili, 18 maiu 2022 (TATOLI)—Prezidente Komisaun G trata asuntu Edukasaun, Juventude, Kultura no Sidadania, António Verdiál de Sousa, relata tuir fiskalizasaun Komisaun nian identifika eskola balun implementa projetu komunitáriu la’o tarde.

Notísia Relevante: Eskola 26 seidauk implementa projetu komunitáriu

Iha tinan fiskál 2022, Komisaun A hosi fulan-janeiru to’o daudaun inisía atividade fiskalizasaun foku ba implementasaun projetu komunitáriu hosi eskola sira iha baze hodi haree besik nomós haree problema bázika iha área edukasaun, nune’e hato’o ba órgaun ezekutivu bele tau atensaun.

“Fiskalizasaun Komisaun iha tinan ne’e ba projetu komunitáriu nia progresu implementasaun eskola balun to’o ona 20% no 60%, maibé iha projetu balun foin atu la’o,” Prezidente Komisaun G ne’e hateten ba TATOLI iha Parlamentu Nasionál, kuarta ne’e.

Iha 2020, Parlamentu Nasionál aprova orsamentu boot hodi hala’o projetu komunitáriu ba eskola hamutuk 2021 iha territóriu tomak, maibé nia implementasaun foin hala’o iha fulan klaran 2021.

Durante fiskalizasaun dahuluk ba munisípiu sira hanesan Manatuto, Baucau, Lospalos, Viqueque no Ermera, haree projetu sira-ne’e la’o daudaun hela no tempu badak sei ba mós munisípiu seluk.

“Durante iha faze, ami identifika projetu balun la’o ona no balun seidauk tanba de’it kondisaun dalan, atu transporta materiál ba área izoladu, ho ida-ne’e hein iha tempu bailoron bele la’o,” nia hateten.

Komisaun nota mós iha orsamentu ne’ebé antes ne’e aprova ba munisípiu benefisia iha eskola foun 10 mak sei konstrui, maibé iha terrenu identifika munisípiu balun iha mudansa totál projetu 11.

“Ida-ne’e parte ezekutivu nian, nune’e sei  konvida Ministériu Edukasaun Juventude no Desportu (MEJD) mai iha Parlamentu Nasionál (PN) klarifika liután,” nia dehan.

Deputadu sira iha komisaun sente kontente ho projetu komunitáriu ne’ebé implementa daudaun, lidera direta hosi diretór eskola sira servisu hamutuk ho autoridade lokál sira.

Tinan 20, eskola sira-ne’ebé uluk Governu konstrui no tempu Indonézia barak mak kondisaun ladi’ak, nune’e durante fiskalizasaun haree ho projeitu komunitáriu ne’ebé VIII Governu Konstitusionál hamosu, trata asuntu eskola konstrui foun eskola ida-ne’e sente kontente.

Nune’e, apresia programa MEJD inisia projetu refere hodi konstrui eskola foun hein katak sei implementa tuir tempu ne’ebé iha, hodi fó benefisia ba povu nia oan asesu eskola ho kondisaun di’ak.

Aliénde ne’e, Prezidente Komisaun G ne’e relata komisaun mós identifika problema báziku ne’ebé eskola sira hasoru durante fiskalizasaun.

Problema real, 90% fiskalizasaun iha eskola sira hasoru mak hanesan falta eskola, kadeira no meza, bee-moos no seluk tán, nune’e Governu presiza tau atensaun másimu.

Nia fó ezemplu simples, eskola ida iha postu administrativu Maubisse, munisípiu Ainaro, halo ho orsamentu boot maibé falta kadeira no meza no piór liu eskola sira iha área remota sira.

“Relatóriu fiskalizasaun sempre halo aprezenta ba plenária no haruka ba ministériu tutela maibé depois ami tuir fila-fali asaun no resposta la másimu, signifika Governu presiza iha seriedade atu tau atensaun,” nia hateten.

Tanba ne’e, nia hateten, hanesan deputadu kumpre de’it nia kna’ar hanesan fiskalizadór maibé órgaun ezekutivu mak iha kompeténsia liu ho seriedade atu tau atensaun.

Tuir nia, edukasaun mak xave ba dezenvolvimentu maibé alokasaun Orsamentu Jerál Estadu (OJE) kada tinan ho porsentu kiik la sufisiente atu responde problema sira ne’ebé iha nune’e tempu ona presiza  alokasaun aumenta to’o porsentu 20 ba leten.

Notísia Relevante: MEJD sei hadi’a tan infraestrutura eskola 250

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here