Ministru Edukasaun, Juventude no Desportu, Armindo Maia. Imajen TATOLI/Francisco Sony

DILI, 20 abril 2022 (TATOLI)—Ministériu Edukasaun Juventude no Desportu (MEJD) iha ona planu atu hadi’a infraestrutura eskola 250 iha territóriu tomak, molok mandatu VIII Governu Konstitusionál ramata iha tinan 2023.

“Ita iha osan emprésimu millaun $15 hosi Banku Mundiál no iha osan adisionál hosi Orsamentu Jerál Estadu (OJE) 2023 hamutuk millaun $2. Ho osan sira ne’e, ita sei hadi’a tan eskola hamutuk 250,” Ministru Edukasaun Juventude no Desportu, Armindo Maia, hateten iha edifísiu MEJD, Villa verde, kuarta ne’e.

Ministru dehan, MEJD hakarak realiza planu infraestrutura edukativa iha tinan 2023 hodi atinje meta konstrusaun no reabilitasaun eskola hamutuk 470 iha territóriu tomak.

Prosesu konstrusaun no reabilitasaun eskola 230 iha territóriu nasionál mós la’o daudaun ona maibé foin mak atinje 6% tanba ninia prosesu tarde tanba implementasaun demora.

Notísia relevante: Eskola 26 seidauk implementa projetu komunitáriu

Eskola 230 ne’ebé daudaun hahú konstrusaun no reabilitasaun, ninia orsamentu mai hosi tinan 2021, maibé foin maka bele implementa iha tinan 2022 tanba problema COVID-19.

Aleinde ne’e, MEJD iha planu atu hadi’a eskola hamutuk 20 to’o 25 hosi verba kapitál dezenvolvimentu iha orsamentu tinan 2022, ho totál millaun $2,3.

“Eskola 230 ne’e iha sala aula 800, hariis fatin, eskritóriu, laboratóriu, no morru ne’ebé tama projetu komunitáriu no kapitál dezenvolvimentu. Ita bele garante sei fó serbisu ba ema hamutuk 5.000 iha territóriu nasionál,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here