Natar iha Viqueque. Imajen Tatoli/Vitorino Lopes da Costa

VIQUEQUE, 15 maiu 2022 (TATOLI)–Primeiru-Ministru (PM), Taur Matan Ruak, prefere tinan ne’e tau importánsia ba setór produtivu, liuliu agrikultura nune’e bele  hasa’e kuantidade produsaun lokál iha rai-laran.

“Setór produtivu dahuluk maka setór agrikultura, tanba ne’e presiza nafatin dezenvolve setór agrikultura no integradu. Bainhira ita-boot sira haree Governu uluk  dezenvolve setór agrikultura, sira fahe tratór iha fatin-fatin, ho konseitu ida bolu ‘Povu kuda Governu sosa’, maibé fatin barak ha’u bá vizita inklui Viqueque sira dehan hanesan ne’e, Prezidente la’ós Povu kuda Governu sosa, realidade ne’e Povu kuda, Governu sae fali,” PM Taur hateten iha suku Waimori, postu administrativu Viqueque vila, munisípiu Viqueque, domingu ne’e.

Notísia relevante: MAP no KOICA inisia hadi’a kadeia valór agríkola iha suku tolu

Haree ba kondisaun ne’e, PM dehan, Governu la fahe ona tratór ba povu maibé sei buka mekanizmu seluk hodi dezenvolve setór produtivu ne’e.

“VIII Governu kaer ukun la fahe ona tratór ba povu, maibé Governu ba sosa to’o produtu lokál laiha. Tinan ida-ne’e Governu sosa produtu lokál to’o millaun $80, to’o fornesedór balun ba sosa fali iha Indonézia, hafoin halo filafali sai produtu lokál. Tanba ne’e, daudaun ha’u husu apoiu organizasaun internasionál hodi tau-matan, liuliu emprezáriu sira ne’ebé bosok sosa produtu lokál hosi rai-li’ur, maibé bosok dehan ne’e produtu lokál Timór nian,” Xefe Governu akresenta.

Aleinde ne’e, Xefe Ezekutivu konsidera la presiza ona sosa tratór, bainhira empreza ruma hakarak sosa tratór fila rai, Governu ajuda selu.

“Tratór ita sosa barak, ikus mai rezutadu laiha no atu halo manutensaun mós susar tanba burokrasia no responsablidade laiha,” nia realsa.

Governu nota iha empreza balun sosa foos Timór saku ida, kahur hamutuk ho foos importasaun saku sanulu

Tanba ne’e, foin lalais ita harii komisaun interministeriál hodi hahú tau-matan ba produsaun to’o komsumu. Ho ida-ne’e ita muda ita-nia maneira halo to’os no natar,” nia tenik.

Aleinde ne’e, atu dezenvolve setór produtivu, daudaun ne’e Governu aloka orsamentu millaun $50 iha Banku Nasionál Komérsiu Timor-Leste (BNCTL, sigla portugés) hodi fó asesu kréditu ho funan kiik, nune’e empreza sira bele halo dezenvolve liután setór produtivu.

Governu liuhosi Ministériu Turizmu Komérsiu no Indústria (MTKI) no Ministériu Koordenadór Asuntu Ekonómiku (MKAE) fó kréditu ba empreza kiik no médiu sira hahú hosi $10.00 to’o 25.000.

 “Sé  maka hakarak halo to’os no natar, ami fó kréditu ho funan 3%, ne’ebé Governu asumi metade,” PM informa.

Notísia relevante: PN aprova adisionál millaun $50 ba MTKI expande implementasaun kreditu suave

Antes ne’e, iha Orsamentu Jerál Estadu (OJE) 2022 ho montante biliaun $1,6 resin, Ministériu Agrikultura no Peska (MAP) prevee $21.400.322, ne’ebé hosi totál ne’e aloka $8.383.382 ba programa agrikultura tinan ne’e.

Programa agrikultura ho nia objetivu sustentável aumenta produsaun no produtividade iha sub-setór espesífiku agrikultura, ortikultura, pekuária, peska ba efisiénsia mellora kompetividade.

Ho nia sub-programa forsa traballu ba prestasaun servisu iha terrenu, sub-programa aumenta sustentável produsaun planta industriál ho nia atividade estabelesimentu agrikultura integradu iha área pontensiál, atividade dezenvolve no mellora ortikultura komunitária, atividade subsídiu agrikultór, apoiu kultivu hodi promove prátika di’ak agrikultura, mobiliza grupu agrikultór no efetividade, efikasia utiliza makina agrikula apropriadu, apoiu inisiativa grupu joven feto no mane.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here