Imajen/Media PR.

DILI, 10 maiu 2022 (TATOLI)—Reprezentante povu iha uma fukun Parlamentu Nasionál liuhosi diskusaun debate espesialidade aprova proposta Orsamentu Retifikativu adisionál millaun $50 hodi aloka ba Ministéiru Turizmu Komérsiu no Indústria (MTKI) atu expande implementasaun kreditu suave.

Notisia Relevante: Empreza na’in-23 sai ona benefisiáriu programa kréditu suave hosi MTKI

“Nune’e proposta númeru 3 aprovadu, ho votu afavór 35, kontra 21 no abstensaun neen (6),” Prezidente Parlamentu Nasionál, Aniceto Longuinhos Guterres Lopes, deklara iha plenária durante diskusaun debate proposta Orsamentu Retifikativu iha faze espesialidade loron dahukuk, tersa ne’e.

Deputadu proponente hosi Deputadu PLP, Francisco de Vasconcelos, Deputadu Fretilin Favião Oliveira ho Deputada KHUNTO Olinda Guterres, mak  aprezenta proposta númeru 3, títulu (servisu/órgaun) Ministéiru Turizmu Komersiu Indústria (MTKI), ketegória despeza transferénsia públika ho programa kódiku 983 investimentu no diversifikasaun ekonómika, sub-programa apoiu ba dezenvolvimentu indústria nasionál, atividade promosaun sosiál negósiu ba credit soft loan ne’ebé dotasaun inisiál $3.475.000 ho alterasaun aumenta $50,000,000 nune’e dotasaun finál $53.475.000

Ho justifikasaun sumária depedénsia exsesiva ba produtu importadu tau ba risku soberania nasaun no seguransa ai-han ba povu Timoroan, 80% populasaun moris iha área rurál liu-liu agrikultura subsistensia ne’ebé depende ba vida agrikultór maibé konstribuisaun setór ida-ne’e nia ba iha produtu internu brutu foin mak 15%.

Dadus hosi FMI (MDF abríl 2022) hatudu katak mai oin sei iha inflasaun nasionál sa’e to’o 8,5 ba nasaun sira iha dezenvolvimentu inklui Timor-Leste.

Haree ba nasaun viziñu hanesan Indonézia ne’ebé prodús mina han nian dalaruma bootliu ninia konsumu doméstiku rasik bandu ona atu exporta mateira prima no mina han nian, iha Timor-Leste mós presiza iha mós polítika atu bele asegura no enkoraza produsaun rai laran aumenta ba ita-nia rezilensia no seguransa rasik ida ne’e refleta soberania nasaun nia rasik.

Ho ida ne’e Governu presiza halo intervensaun hanesan aumenta prokura ou demand aba produtu lokál, aumenta oferta ka supplay hosi produtu lokál, Segura ambiente negósiu ida saudavel no investimentu estratéjiku liu hosi modalidade investimentu sira ne’ebé disponivel ou viabel.

“Proposta ne’e ho objetivu injeta tan osan kreditu suave ba empreza sira-ne’ebé bele asesu,”  Deputadu proponente Francisco Vasconselos fundamenta.

Primeiru-Ministru (PM), Taur Matan Ruak, hateten MTKI daudaun ne’e jere projetu soft loan ka kreditu suave, tantu nia sistema iha ona, hakarak expande de’it no Ministéiru Koordenadór Asuntu Ekonómiku (MEKAE), Ministéiru Finansa (MF) ne’ebé komisaun intermisteriál apoiu hosi komisaun téknika ida lidera hosi gabinete PM rasik.

“Ita haree didi’ak produsaun produtu rasik foin daudaun ho Cesta Bázika sa’e ba 47%, produtividade konfirmadu hosi dadus resentemente ne’ebé ita iha hanesan merenda eskolár, ai-han ba PNTL, F-FDTL, ai-han ba ospitál sira, prizaun no seluk tan dalabrak ita ba sosa fali iha rai seluk, nune’e hakarak aumenta kapitál ba kreditu suave millaun $50 ne’ebé MTKI fó kréditu aumenta ba mikro no empreza kiik dezenvolve setór hirak ne’e,” PM hateten.

PM Taur hateten, osan ne’e la gasta no iha de’it banku fó korajen ba banku no setór privadu halo levantamentu investe fali ba setór produtivu, tanba ne’e agardese ba proposta ida-ne’e

“Kreditu ba mikro, pequena, media empreza halo bainhira ita hakarak aumenta ba inisialmente $1000 to’o rihun $25 hakarak aumenta ba rihun $250 no Grande empreza hahú hosi rihun $250 ba millaun $1,” nia hateten.

Ministru MTKI, José Lucas, apresia ba deputadu proponente sira-ne’ebé aprezenta proposta refere.

“Durante ne’e foti kestaun katak ita presiza tebes fó importánsia iha setór produtivu iha rai-laran, tanba ne’e Governu liuhosi konseitu ne’ebé oinsá haforsa valór inisativa ne’e inkorpora iha programa ne’ebé existente iha ona MTKI ba soft loan ba kreditu suave,” nia hateten.

Ne’ebé, durante pequena indústria kiik barak asesu kreditu hala’o atividdade hanesan setór agrikultura, turizmu no komérsiu ho sira seluk nune’e modalidade ida-ne’e importante tebes iha tempu ida agora oportunu atu expande liután.

Maibé, deputada CNRT, Fernanda Lay, kestiona ho kapasidade ezekusaun Orsamentu Jerál Estadu (OJE) 2022 ba MTKI, ne’ebé daudaun ne’e pursentu kiik tebes maibé agora husu tan orsamentu adisionál iha retifikativu, nune’e preokupa  tebes ho nia ezekusaun.

Jornalista : Nelson de Sousa

Editór     : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here