Produtu lokál iha bazar tradisionál Dili, sesta (16/10). Imajen TATOLI/António Gonçalves

DILI, 10 marsu 2022 (TATOLI)—Governu Koreia Súl  liuhosi Ajénsia Kooperasaun Internasionál Koreia (KOICA, sigla inglés) hamutuk Ministériu Agrikultura no Peska (MAP), kinta ne’e, lansa projetu hadi’a kadeia valór agríkola liuhosi partisipasaunn agrikultór.

Projetu ne’e finansia hosi Governu Koreia Súl liuhosi KOICA ho montante milliaun $6, ne’ebé sei implementa iha tinan 2022-2025 iha suku tolu hanesan Seloi Kraik iha munisípiu Aileu, Horai kiik iha munisípiu Ainaro, no Kamele Horu iha munisípiu Liquiçá.

“Agradese ba kolaborasaun di’ak ho komunidade iha Timor-Leste, no valór hosi projetu ne’e hanesan unifikasaun sabedoria, esperiénsia no entuziasmu nasaun rua. Ami hakarak kolabora ho emprendedór inisiante sira no mós organizasaun prosesamentu ai-han sira, hodi aumenta tan valór ba ita-nia produtu no merkadu foun,” Project Management Committee (PMC) KOICA, Kim Jangsaeng, hateten liuhosi nia diskursu, iha salaun Ministériu Finansa, Aitarak-laran.

Notísia relevante: Medida seguransa ai-han hemenus frajilidade ekonomia hasoru impaktu negativu COVID-19

Nune’e, nia iha esperansa ba oin atividade ne’e bele asegura dezenvolvimentu sustentável komunidade.

Aleinde ne’e, PMC KOICA sujere estratejia hasa’e produsaun hanesan organizasaun no komersializasaun mak dahuluk hodi dezenvolve irrigasaun agríkola no estrada, bee-matan ne’ebé dezenvolve ona sei fó asesibilidade ba merkadu, ne’ebé sei asegura liuhosi konstrusaun estrada.

Péritu hosi Koreia sei fó treinamentu ba estensionista, líder kooperativa, agrikultór no grupu agrikultór sira sei hetan mákina no materiál agríkola inklui kestaun prosesamentu sei harii grupu agrikultór no kooperativa.

Benefisiáriu ba projetu ne’e iha suku Kamale-Horu hamutuk 420, Seloi-Kraik 6.300 no ba Hora-Kiik 450.

Projetu ne’e iha ona konkordánsia KOICA ne’ebé hakarak diversifika kanál distribuisaun sentru kolesaun sai hanesan plataforma ba produtór no intermediar sira, inklui kanál komérsiu direta entre konsumindór sei asegura liuhosi merkadu agrikultór ka loja agrikultór sira iha Dili.

“Haree ba medida merkadu iha Timor-Leste, ita presiza hanoin atu habelar merkadu ba rai-li’ur, otél no restaurante sira ne’ebé nu’udar ami-nia kliente boot,” nia dehan.

Iha biban hanesan, Ministru Agrikultura no Peska, Pedro dos Reis, agradese ba Governu Koreia Súl tanba fó ona apoiu finansiamentu hodi hasa’e produsaun agríkola.

“Ha’u husu komunidade ne’ebé sai benefisiáriu tenke aproveita oportunidade ho di’ak, nune’e bele hasa’e produsaun ortikultura iha ita-boot sira-nia suku, tanba apoiu hanesan ne’e la’ós mai beibeik, maibé mai ho tempu,” nia fó hanoin.

Nune’e mós, Embaixadór Koreia Súl iha Timor-Leste, Kim Jeong, apresia ho prorgrama ne’e no otimista bele kontribui ba vida agrikultór.

“Ha’u fiar projetu ne’e sei kontribui ba agrikultór sira-nia moris di’ak iha Timor-Leste, tanba Koreia iha vontade no bele koopera ho Timor-Leste iha setór agrikultura  no dezenvolvimentu mútua, Koreia buka koopera ho Timor-Leste hodi hametin seguransa ai-han, hadi’a povu nia moris no promove dezenvolvimentu ekonómiku iha Timor-Leste,” nia tenik.

Xefe Suku, Seloi Kraik, Gabriel Mendonça, agardese ba Governu Koreia Súl no KOICA ne’ebé hili ona sira-nia suku hodi bele implementa projetu ne’e iha fulan marsu ka abríl tinan ne’e.

Projetu hadi’a  kadeia valór agríkola liuhosi partisipasaun agrikultór sira no KOICA hili Universidade da Paz (UNPAZ) hanesan instituisaun ne’ebé responsável ba peskiza dadus inkéritu, liuhosi partisipasaun agikutór ortikultura iha suku tolu.

Ba inisiativa ne’e, KOICA no UNPAZ formaliza ona servisu kooperasaun liuhosi nota entendimentu ida.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here