VARANDA DILI Ramos Horta propoin konvida bainaka espesiál no líder mundiál 18

Ramos Horta propoin konvida bainaka espesiál no líder mundiál 18

319

DILI, 06 maiu 2022 (TATOLI)—Prezidente Komisaun Organizadora, Manuel Soares Tilman, informa Prezidente repúblika eleitu, José Ramos Horta, propoin lista bainaka espesiál no líder mundiál na’in-18 ba Governu atu konvida no partisipa iha serimónia tomada pose no selebrasaun 20 maiu 2022.

Notísia Relevante: MNEK: Bainaka rua resposta positiva no ida seluk posibilidade

“Konvite ne’ebé ita haruka ba estranjeiru kuaze 200-resin. Hosi númeru ne’e, lista naran ema na’in-18 mak Prezidente Repúblika eleitu propoin ba Governu atu konvida. Bainaka seluk ne’e, Xefe Estadu no Xefe Governu mak konvida nia ómologu maibé lista konvite hotu-hotu sei liuhosi Ministériu Negósiu Estranjeiru no Kooperasaun (MNEK) mak sei halo lina koordenasaun ho sira,” Prezidente Komisaun Organizadora ne’e hateten ba Agência TATOLI, via telefónika, sesta ne’e.

Agora daudaun, nia dehan, sira-nia parte hein de’it lista bainaka sira-ne’ebé fó ona ba MNEK maibé to’o agora seidauk iha serteza, agora follow up seidauk hetan rezultadu katak bainaka hirak ne’e atu partisipa ka la’e iha serimónia tomada pose ne’e.

Hosi karta konvite hirak ne’e, nia dehan, foin mak hetan konfirmasaun hosi bainaka espesiál balun ne’ebé atu partisipa mak Prezidente Repúblika Portugál, Marcelo Rebelo de Sousa ho nia ekipa no mós Ministru Negósiu Estranjeiru Nova Zelândia ho nia ekipa.

Aleinde ne’e, Komisaun Organizadora mós identifika ona otél sira iha kapitál Dili atu prepara ba bainaka espesiál no líder mundiál sira-nia fatin deskansa, hodi bele tuir serimónia tomada pose ba PR eleitu no selebrasaun loron restaurasaun independénsia TL bad ala-XX iha Tasi-Tolu, Dili.

“Otél sira iha Timor-Leste ami identifika hotu ona mak hanesan Otél Timor, Timor Plaza, Otél Novo Turismo no seluk tan, ezetu Otél Ramelau mak lae tanba nia kondisaun la di’ak no laiha manutensaun. Ita presiza otél sira-ne’ebé mak di’ak, moos no seguru,” nia dehan.

Bainaka espesiál no líder mundiál sira ne’e, sei estadia iha Timor-Leste durante loron haat nia laran ne’ebé hahú hosi kuarta-sábadu, 18-21 maiu 2022.

Preprasaun fatin atinje ona 80%

Entretantu, preparasaun fatin ba serimónia tomada pose Prezidente Repúblika eleitu, José Ramos Horta, no selebrasaun loron restaurasaun independénsia ba dala-XX iha Tasi-Tolu ne’e, atinje ona ona 80%.

“Preparasaun fatin ba toma pose no loron redtaurasaun independénsia Timor-Leste ne’e atinje ona 80%, tanba ita-nia ekipa monta daudaun ona tenda ba bainaka Verry Important Person (VIP) no Verry Verry Important Person (VVIP) inklui tenda ba ita-nia komunidade no mós otél ba bainaka importante sira preparasu,” nia dehan.

Hosi 80% ne’e, nia informa hela de’it 20% seidauk hotu maibé hela prenxe de’it ona kadeira, meza, no instalasaun sira no seluk tan.

“Preparativu 80% ne’e, ami garante tebes maibé ita la espera iklima natureza nian, dala tan ami hosi Komisaun Organizadora garante kualidade preparasaun ba selebrasaun 20 maiu ba restaurasaun independénsia Timor-Leste nian no toma pose ba ita-nia Prezidente Repúblika eleitu, José Ramos Horta, iha loron 19 maiu 2022,” nia dehan.

Tuir Agêbcia Tatoli nia observasaub iha terrenu katak, funsionáriu Ministériu Administrasaun Estatál (MAE) hamutuk ho ekipa hosi Ajensia Dezenvolvimentu Nasionál (ADN) halo hela limpeza iha fatin serimónia ne’e iha Tasi-Tolu.

Notísia Relevante: Bainaka 2.500-resin sei partisipa serimónia fó pose ba Ramos Horta

PNTL prontu fó seguransa ba bainaka espesiál sira hosi rai-li’ur

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here