Komandante Jerál PNTL, Komisáriu Faustino da Costa. Imajen TATOLI/Francisco Sony.

DILI, 28 abríl 2022 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, hateten komandu PNTL prontu fó seguransa ba bainaka espesiál sira hosi rai-li’ur iha serimónia toma pose Prezidente Repúblika eleitu, José Ramos Horta, iha 20 maiu 2022.

Notísia Relevante: Horta sei konvida eis Prezidente Amérika-Portugal partisipa serimónia toma pose

“Preparasaun PNTL nian saida mak sei halo iha serimória rua ne’e, ida-ne’e ohin ami hato’o no Prezidente Repúblika mós informa hela katak nia parte konvida mós Xefe Estadu sira hosi rai-liur. Ba oin, ami sei koordena nafatin naran konfirmadu Xefe Estadu no Xefe Governu na’in hira mak mai, nune’e ami bele fó ona orientasaun prepara membru ba seguransa pesoál no koloka ekipamentu nesesáriu,” Komandante Jerál PNTL ne’e hateten ba jornalista sira hafoin ramata enkontru ho Xefe Estadu, Francisco Guterres Lú Olo, iha Palásiu Prezidensiál Nicolau Lobato, Bairu Pite, kinta ne’e.

Maibé, nia dehan, daudaun ne’e komandu Polísia Nasionál Timor-Leste (PNTL) sei hein komisaun organizadora kona-ba lista naran bainaka espesiál sira hanesan Xefe Governu no Xefe Estadu hosi nasaun sira-ne’ebé atu mai partisipa serimónia ne’e.

Notísia Relevante: PNTL-MAE hala’o preparasaun seguransa ba serimónia toma pose PR foun

“Normalmente kuandu Xefe Estadu mak mai protokolu diferensa uitoan,” nia dehan.

Durante sorumutu, Komisáriu Faustino da Costa, relata situasaun seguransa iha territóriu nasionál ba Prezidente Repúblika katak seguransa iha rai-laran kontroladu.

Iha biban ne’e, Xefe Estadu Francisco Guterres Lú Olo, nafatin fó agradese ba servisu ne’ebé polísia halo durante ne’e no husu atu mantein nafatin liu-liu iha serimónia ofisiál rua ne’ebé sei akontese iha fulan maiu ne’e.

Notísia Relevante: Governu prepara fatin serimónia toma pose ba PR eleitu atinje ona 45%

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here