Ministériu Negósiu Estrajeiru no Kooperasaun (MNEK), Adaljiza Xavier Reis Magno. Imajen Tatoli/Francisco Sony

DILI, 04 maiu 2022 (TATOLI) – Ministériu Negósiu Estranjeiru no Kooperasaun (MNEK), simu ona informasaun hosi bainaka importante hosi Prezidente Repúblika Portugés, Marcelo Rebelo de Sousa, Ministru ida hosi Nova Zelándia no Governadór Austrália maibé sei haree fali.

Bainaka espesiál sira nia prezensa ho objetivu atu partisipa Loron Restaurasaun Independénsia Timor-Leste ba dala-XX no sai sasin ba tomada posse Prezidente Repúblika eleitu, José Manuel Ramos Horta .

“Ita-nia bainaka tolu ne’e mak agora daudaun iha ona resposta, sira seluk sei hein informasaun, maibé ba Governadór Austrália sei haree fali mós, tanba sira sei iha eleisaun iha loron 21 maiu maibé karik mai sira aranja lojístika, nune’e 20 maiu kalan fila kedas”, Ministra Negósiu Estranjéiru no Kooperasaun, Adaljiza Albertina Xavier Reis Mango, hateten iha Palásiu Governu, depois reuniaun Konsellu Ministru.

Adaljiza refere responsabilidade orgaun Prezidénsia Repúblika emite konvite ba bainaka espesiál sira mak omólogu hosi Indonézia, Portugal, Governadór Austrália, Prezidente Repúblika Xina, Prezidente Amerika no Sekretáriu-Jerál Nasaun Unida.

Nune’e, Governu mak konvida omólogu Portugal, Primeiru-Ministru ASEAN tomak, Komunidade País Lian Portugés (CPLP, sigla portugés), Austrália, Nova Zelándia no Primeiru-Ministru Vanuatu.

“Hosi MNEK ami bolu multilaterál haat Sekretáriu-Jerál ASEAN nian, Sekretáriu Ezekutivu CPLP, nomós nivél ministru ba asuntu negósiu estranjeiru nian iha Uniaun Europeia no mós Prezidente ba G7+”, konklui.

Jornalista : Arminda Fonseca

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here