Prezidente eleitu Jose Ramos Horta. Imajen Tatoli /Egas Cristóvão.

DILI, 27 abríl 2022 (TATOLI)—Prezidente Repúblika eleitu ba periódu 2022-2027, José Ramos Horta, kuarta ne’e, hala’o enkontru dahuluk ho atuál Xefe Estadu, Francisco Guterres ‘Lú Olo’, hodi kumprimenta hodi ko’alia prosesu hand over no preparasaun ba serimónia tomada de pose nian.

Notísia Relevante: Governu prepara fatin serimónia toma pose ba PR eleitu atinje ona 45%

Prezidente Repúblika eleitu, José Ramos Horta, konvida bainaka espesiál hosi rai-li’ur no líder mundiál balun, hanesan eis Prezidente Amérika no Portugal atu partisipa serimónia toma pose, maske tuir regra protokolu ne’e Xefe Estadu mak hasai konvite ba nia ómologu hosi rai-li’ur.

“Tuir regra protokolu Xefe Estadu mak hasai karta maibé ha’u pesoalmente tanba kuñese líder sira, nune’e haruka tiha ona ha’u-nia konvite pesoál hanesan iha enkontru ho Embaixadór hotu hosi ASEAN, laureadu prémiu nobel da pás, eis Prezidente Repúblika hosi Japaun, Amerika, Abudabi Dubai, Korea, Xina no Portugal, hein sira bele partisipa,” Prezidente Eleitu ne’e hateten ba jornalista hafoin ramata enkontru iha edifísiu Palásiu Prezidensiál Nicolau Lobato, Bairu Pite.  

Iha enkntru dahuluk ne’e, Ramos Horta ba aprezenta ninia kumprimentu ba Prezidente Repúblika Lú Olo ne’ebé simu nia ho delegasaun ho di’ak tebe-tebes nu’udar líder nasionál.

Objetivu primeiru ne’e ko’alia kona-ba prosesu hand over no serimónia pose ho selebrasaun loron restaurasaun indepedénsia 20 maiu, liu-liu oinsa serimónia ne’e la’o ho di’ak no la’o ho dignidade hanesan Estadu ida.

Enkuantu tuir rezultadu eleisaun prezidensiál segunda volta kandidatu Prezidente Repúblika, José Ramos Horta hetan votu 398.028 (62,1%) no Francisco Guterres Lú Olo hetan votu 242.939 (37,9%).

Nune’e Prezidente repúblika eleitu simu pose mak atuál Xefe Estadu Francisco Guterres Lú Olo sei termina mós nia mandatu iha 20 maiu 2022.

Antes ne’e, Ministru Administrasaun Estatál (MAE), Miguel Ferreira Carvalo, hateten Governu liuhosi MAE no entidade relevante sira seluk nu’udar komisaun organizadora ba eventu rua hanesan serimónia pose PR eleitu no komemorasaun loron restaurasaun indepedensia 20 maiu tinan ne’e, daudaun ne’e la’o hela no garante preparadu hodi realiza serimónia ofisiál Estadu nian ne’e.

Atu realiza serimónia toma pose ne’e hetan susesu, Governu Timor-Leste aloka orsamentu millaun $1,6 ba realizasaun atividade simu pose no selebrasaun loron restaurasaun independénsia ba dala-XX (20 maiu 2022-20 maiu 2022) ne’e.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here