Ekipa selesaun nasionál U-23 hahú treinamentu ba preparasaun SEA Games, iha kampu PKNS, Malázia, sábadu (23/04). Imajen Tatoli/Hortencio Sanchez

KUALA LUMPUR, 24 abril 2022 (TATOLI)—Treinadór prinsipál ekipa selesaun nasionál Timor-Leste Under 23 (U-23), Fabio Maciel da Silva, enkoraja atleta futeból hodi halo treinamentu no partisipa jogu amigável sira nune’e bele prepara-an di’ak liután bainhira partisipa iha kompetisaun.

Ekipa selesaun nasionál hamutuk na’in-22 ne’ebé daudaun iha Malázia, sei partisipa Jogu Sudeste Aziátiku (SEA Games, sigla inglés) ba dala-31 tinan 2021, ne’ebé sei hala’o iha Hanoi, Vietname, hahú loron 12 to’o 23 maiu 2022.

“Sira ne’e jogadór foun, hanesan jerasaun foun Timor-Leste nian tenke fó treinu ba sira ho didi’ak, halo jogu amigável barak ho nasaun sira hotu iha rai-li’ur atu sira bele toman, nune’e bainhira partisipa kompetisaun, ba sira hanesan bai-bain ona,” Treinadór hateten ba Agência Tatoli, iha nia hela fatin, iha Kuala Lumpur, Malázia, domingu ne’e.

Notísia relevante: Selesaun nasionál U-23 hahú treinamentu iha Malázia ba SEA Games

Nune’e, nia parte sei ajuda jogadór sira atu hatudu rezultadu di’ak iha multi eventu hanesan SEA Games no jogu seluk ne’ebé sei akontese iha tinan ne’e.

Aleinde ne’e, esforsu ne’ebé Treinadór halo konsege hatudu pasu pozitivu tanba iha kompetisaun Asian Football Federation (AFF) iha fulan hirak liubá kotuk, Timor-Leste hetan rezultadu di’ak, okupa iha pozisaun kuartu lugar.

Nune’e mós, Treinadór buka dalan kontaktu ho ekipa iha rai-li’ur hodi konsege haruka ona jogadór estrela Timor-Leste, Paulo Gally ba halo ona treinamentu iha España. 

Notísia relevante: Jogadór estrela TL sei la reforsa selesaun nasionál U-23 iha Sea Games

“Ha’u buka dalan oin-oin to’o agora Gally susesu duni, oras ne’e to’o ona España hodi halo treinamentu iha ne’ebá. Jogadór potensiál sira hanesan ne’e ita tenke ajuda lori sai ba li’ur atu sira-nia karreira labele mate,” nia dehan.  

Jornalista : Hortencio Sanchez

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here