KUALA LUMPUR, 23 abril 2022 (TATOLI)—Ekipa selesaun nasionál Timor-Leste Under 23 (U-23), sábadu ne’e, hahú hala’o treinamentu loron dahuluk hanesan preparasaun ba Jogu Sudeste Aziátiku (SEA Games, sigla inglés) ba dala-31 tinan 2021, ne’ebé sei hala’o iha Hanoi, Vietname, hahú loron 12 to’o 23 maiu 2022.
“Ohin hotu-hotu treinu foku liu ba rekuperasaun ba jogadór sira tanba horiseik sira halo viajen dook, entaun sira kole, ohin ne’e halo rekuperasaun no halo mós preparasaun ba SEA Games,” Treinadór prinsipál ekipa selesaun nasionál Timor-Leste U-23, Fabio Maciel da Silva, hateten ba Agência Tatoli, iha kampu PKNS, Kuala Lumpur, Malázia.
Notísia relevante: Jogadór estrela TL sei la reforsa selesaun nasionál U-23 iha Sea Games
Ekipa nasionál sei kontinua treinamentu iha Malázia durante semana ida resin no aproveita halo jogu amigável ho selesaun nasionál Malázia U-23 atu koko forsa ekipa rua.
Treinadór konsidera, treinamentu ne’e hanesan meiu ida atu haforsa jogadór sira-nia enerjia atu fresku liután.
“Jogadór sira-nia preparasaun atu halo sira fresku, nune’e iha kompetisaun sira bele hatudu jogu di’ak. Totál jogadór ne’ebé halo hela treinamentu hamutuk na’in-22, inklui guarda rede na’in-tolu,” nia akresenta.
Ekipa selesaun nasionál U-23 sei aranka ba Vietname iha loron 02 maiu hodi partisipa iha jogu SEA Games.
Tuir oráriu SEA Games, iha jogu futeból Timor-Leste sei kontra Filipina, Vietnam, Myanmar no Indonézia.
Durante eventu multidesportivu ne’e, sei iha kompetisaun hamutuk 526 hosi desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazeia mós hosi regra Southeast Asian Games Federation (SEAGF).
SEA Games ba dala-31 ne’e, ba dahuluk sei aprezenta jogu Xiangqi ka xadres hosi Xina.
Eventu ne’e sei partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.
Jornalista : Hortencio Sanchez
Editora : Julia Chatarina