Jogdór Estrela Timor-Leste U-23, Paulo Gally Freitas (faru mutin). Imajen/Espesiál

MALÁZIA, 23 abríl 2022 (TATOLI)—Jogdór Estrela Timor-Leste U-23, Paulo Gally Freitas, sei la reforsa ekipa selesaun nasionál U-23 hodi joga iha Sea Games ne’ebé sei hala’o iha fulan-maiu (2022) iha Vietname tanba nia arranka ona ba España hodi halo treinamentu espesiál.

Notísia Relevante: Selesaun nasionál U-23 hala’o treinamentu iha Malázia

“Ha’u sei la joga iha Sea Games tanba sei arranka ba España hodi halo preparasaun, tanba iha ona klube internasionál balun interresadu atu rekruta ha’u,” Paulo Gally Freitas informa ba Agência TATOLI iha aeroportu Bali, sesta ne’e.

Oras ne’e daudaun, jogadór estrela Timor-Leste ne’e arranka ona ba España no la hamutuk ona ho nia kolega jogadór sira iha selesaun nasionál U-23, ne’ebé daudaun ne’e halo hela treinamentu preparasaun iha Malázia hodi prepara an atu ba partisipa iha kompetisaun Sea Games.

Gally nia prestasaun iha mundu futebol konsege dada klube internasional sira-nia matan, bainhira nia hatudu jogu brillante iha kompetisaun kopa Asian Football Federation (AFF) iha Cambodia fulan hirak liu ba.

Bainhira Agência TATOLI konfirma kona-ba klube internasionál ida-ne’ebé laran monu no atu rekruta nia, maibé nia seidauk bele fó resposta ne’ebé klaru tanba nia sei fó hatene ba públiku bainhira klube internasionál ne’e halo ona kontratu ba nia.

Gally nia esperiensia iha futeból

Ba jogadór fitun ne’e, dezafiu saida no oinsá de’it mak mosu tenke hasoru no simu ho hamnasa-midar, tanba ida-ne’e hanesan luta ida-ne’ebé tenke buka manán ninia an rasik liuhosi luta makaas.

Hafoin hala’o entrevista, jornalista Agência tatoli Hortencio Sanchez hasai retratu hamutuk ho jogdór estrela Timor-Leste U-23, Paulo Gally Freitas. Imajen/Espesiál

Atu manan dezafiu foun iha nia moris, obstakulu ne’e dezafia nia (Paulo Gally Freitas) ne’ebé foin halo idade 15 ne’e tenke hasoru dezafiu foun iha nia moris.

Razaun, tanba nia hetan krítika moruk hosi nasaun lubun no timor-oan balun hodi dun-matak katak nia falsifika tinan-moris iha jogu internasionál Asian Football Federation (AFF) U-15 foin lalais ne’e iha Tailándia.

Maibé, ba jogadór ne’ebé moris iha 31 dezembru 2004 ne’e, la hatudu oin tauk hasoru krítika maibé hetok nia simu-hasoru ho ho oin-midar no hakmatek hodi manán-hasoru presaun ho maturidade no hada’u dezafiu ho otimizmu.

Gally sai sentru atensaun ba adversáriu sira tanba nia iha esesu nu’udar jogadór avansadu extrimu ne’ebé badinas kaer bola no matenek kedok bola hodi hatama golu, liuhosi hatudu ninia asesu iha jogu AFF ne’ebé nia eleitu sai mellór markadór ho golu 5 iha jogu refere.

Ninia fíziku atletiku, isin mutin no ain aas. Tanba ne’e, se matan fihir sala, ema bele haree sala dehan nia la’ós moris iha tinan 2004, maski liuhosi rezulatdu teste médiku iha Sentru Saúde AFF no AFC nian la hatudu faktu katak nia falsifika nia tinan moris.

Estudante Ensinu Sekundáriu Katóliku Kristal ne’ebé hahú nia kareira futeból iha Sentru Juvenil FFTL iha tinan 2011 ne’e hateten, ba oin, nia kontinua mantein nia pozisaun hodi hatudu jogu ne’ebé di’ak liután, nune’e bele lori Timor-Leste nia naran morin iha mundu liuhosi munsu futeból.

Liafuan “Aifuan monu la dook hosi nia hun” ne’e merese hanesan karimbu ida prega ba oan hosi João da Costa Freitas no Ana Maria Martins Nascimento, tanba fatór jenétiku hosi nia inan ne’ebé uluk hanesan jogadora ida, lori Gally daudaun hanesan jogadór estrela iha Timor-Leste.

“Ha’u-nia pai uluk sei ki’ik la mete futeból. Só ha’u-nia maen de’it mak halimar bola. Tanba ne’e, ha’u tuir ha’u-nia maen nia ain-fatin,” Oan dalimak hosi maun-alin na’in-neen (6) ne’ebé oras ne’e sai jogadór avansadu prinsipál iha klube Lalenok United FC ho númeru kamizola 21 ne’e ho oin midar.

Jornalista : Hortencio Sanchez

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here