Ministru Justisa, Tiago Amaral Sarmento. Imajen Tatoli/Francisco Sony

DILI, 22 abríl 2022 (TATOLI)-Governu liuhosi Ministériu Justisa iha tempu badak sei estabelese akordu ida arrendamentu ho Pertamina Internasionál hodi selu arrendamentu ba kofre Estadu tanba uza ona rai estadu hodi halo negósiu.

“Sira ne’ebé okupa rai iha ne’ebá Pertamina Internasionál iha vontada mai hasoru ona ha’u, mai hato’o ona sira-nia pedidu hakarak halo kontratu arredamentu no selu arrendamentu rai ne’ebé sira uza hodi halo atividade,” Ministru Justisa (MJ),Tiago Amaral Sarmento, hateten ba Agência TATOLI iha nia kna’ar fatin Caicoli, iha loron 22 fulan-abríl 2022.

Notísia Relevante :Tempu besik, MJ formaliza akordu arrendamentu ho empreza ENSUL

Durante ne’e, nia justifika Pertamina Internasionál seidauk selu arrendamentu ba Estadu maske uza ona rai hodi halo atividade negósiu iha Timor-Leste.

“Governu ida ne’e, iha ha’u-nia mandatu  ha’u aplika no impoin lei, halo tuir lei, ita hotu tenke hakruk ba lei, tanba ita-nia lei kompletu ona, ita labele impoin lei ba ema ki’ik hodi kumpre selu fulan-fulan  arrendamentu ba Estadu enkuantu sira ida halo atividade bo’ot ita husik hela ne’e la justu lei tenke ba ema hotu,”Ministru Justisa Tiago Sarmento kompromete.

Ministériu Justisa sei esforsu atu aplika lei ba kompañia nasionál no internasionál hodi selu arrendamentu ba Estadu tanba uza ona rai no uma Estadu hodi halo negósiu.

Tuir dadus hosi Sekretaria Estadu Terra no Priopriedade (SETP) hatudu iha tinan 2019 to’o 2020, rekolla reseita hamutuk millaun $4,2 no tinan 2021 rekolla millaun $1,2. Enkuantu iha tinan 2017 to’o 2018 rekolla millaun $2-resin.

SETP rekolla hosi arrendamentu rai Estadu hosi instituisaun privadu no pesoál privadu, ne’ebé mak utiliza rai Estadu no halo kontratu ho Estadu.

Tuir dadus ne’ebé publika antes ne’e, sidadaun ne’ebé okupa patrimoniu Estadu hanesan edifísiu no rai Estadu hodi halo negósiu hamutuk 1.114, ne’ebé ninia presu selu sei haree ba klasifiksaun no poténsia rai, uza hela ka halo negósiu, nia presu sei la hanesan.

Alende ne’e, rejista 8.340 arrendatáriu iha territóriu ne’ebé mak halo kontratu utiliza patrimóniu Estadu no selu kada fulan.

Enkuantu, arrendatáriu hamutuk 4.115 maka selu ativu, maibé 4.225 mak la kumpre selu areendamentu desde 2017 to’o 2020.

Tuir Lei númeru 1/2003 no dekretu lei númeru 19/2004 ne’ebé ko’alia kona-ba propriedade Estadu no kobra arrendamentu.

Notísia Relevante :Tempu besik, Governu asina akordu arrendamentu rai no uma ho EUA

Jornalista: Natalino Costa

Editór :Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here