DILI, 08 abríl 2022 (TATOLI)— Ministru Justisa, Tiago Amaral Sarmento, sesta ne’e, halo reuniaun ho Enkarregadu Negósiu Embaixada Estadu Unida Amérika (EUA), Tom Daley, hodi ko’alia asuntu asina akordu arrendamentu rai no uma ne’ebe EUA uza hanesan sira nia Embaixada iha Timor-Leste.
Iha reuniaun ne’e, Minsitru Tiago Amaral dehan rai no uma Estadu ne’ebé Governu Timor-Leste entrega ba EUA hodi estabelese sira nia Embaixada laiha problema, nune’e iha tempu badak Governu Timor-Leste ho EUA asina akordu arrendamentu.
“Ha’u hanoin kona-ba arrendamentu rai ita ho Estadu Unidu Amérika (EUA) laiha problema, parte rua ita nian ho sira laiha problema. Ita fó rai ba EUA halo atividade diplomatiku iha ita nia rai. Parte EUA mós fó rai iha Washington, Nova Iorke atu estabelese ita-nia Embaixada ne’ebá. Iha relasaun billaterál sempre iha resiprosidade katak, ita fó ba sira no sira mós fó ba ita,”Governante ne’e hateten ba jornalista sira hafoin ramata reuniaun iha Gabinete MJ-Caicoli,sesta ne’e.
Governu Timor-Leste fó arredamentu ho valór simbolikamente hosi prazu ne’ebé maka iha no parte rua aseita hotu atu asina akordu arrendamentu ba tinan-50.
Nune’e, Ministériu Justisa hahú koordena ona ho Ministériu Negosiu Estranjeiru no Kooperasaun (MNEK) atu formaliza akordu arrendamentu ne’e.
Alende ne’e, Ministru Tiago kompromete sei aplika akordu arredamentu rai ho Embaixada sira iha Timor-Leste, ne’ebé seidauk iha akordu arredamentu ho Estadu Timor-Leste.
Iha biban hanesan, Enkarregadu Negósiu Embaixada Estadu Unida Amérika (EUA), Tom Daley, dehan, reniaun ne’e ho objetivu hodi hametin kooperasaun bilateral entre Timor-Leste ho EUA.
“Ha’u kongratula Ministru Justisa no iha ami nia enkontru ko’alia liu kona-ba kooperasaun ne’ebé maka EUA ho Ministériu Justisa hala’o ona iha área justisa no asuntu balun tan,” Diplomata ne’e afirma.
Jornalista: Natalino Costa
Editór : Florencio Miranda Ximenes