Jornalista sira bainhira halo kobertura iha ámbitu luta kontra COVID-19. Imajen TATOLI/Egas Cristóvão.

DILI, 14 abril 2022 (TATOLI)—Ministériu Asuntu Parlamentár no Komunikasaun Sosiál (MAPKOMS), daudaun ne’e verifika fali lista jornalista liña frente nia naran atu submete hikas ba Ministériu Finansas (MF) atu halo pagamentu.

Notísia Relevante: MF haruka lista liña frente jornalista ba MAPKOMS molok prosesa pagamentu

“Lista ha’u simu ona. Ita-boot sira hatene, kuaze semana hira ha’u laiha Timor, ha’u iha tiha li’ur foin to’o mai. Lista to’o ona mai, prosesu ami haree fila-fali iha horisehik no hori bainrua ha’u haruka asesór sira haree fila-fali. Tanba tuir lei ne’e ba de’it front line ne’ebé halo nia knar iha front line. Ami sei submete hikas lista jornalista liña frente nia naran ba ministériu finansa,” Ministru Asuntu Parlamentár no Komunikasaun Sosiál (MAPKOMS), Francisco da Costa Jerónimo Martins, hateten ba jornalista sira, iha Edífisiu Ministériu Administrasaun Estatál (MAE) Caicoli, Dili, kinta ne’e.

Nia dehan, agora saida mak iha lista ne’e hosi parte balun hanesan sira-ne’ebé iha administrasaun no sira-ne’ebé la’ós jornalista mós naran iha, entaun tuir lei Ministériu Finansa katak la aprópriadu no tenke hadi’a lista ne’e, entaun nia solusaun mak haruka asesór sira haree fila-fali karik sira-ne’ebé deteta katak la’os jornalista ne’e tenke elimina.

“Ha’u husu ita hotu fuan boot, tanba ita hakarak servisu ba sira-ne’ebé merese duni atu simu,” nia dehan.

Kona-ba lista 507 ne’ebé aprova ona hosi MAPKOMS, Governante ne’e akresenta, MAPKOMS aprova lista 507 ne’e, tanba tuir prosesu sira-ne’e mai katak loos ona mak MAPKOMS aprova.

“Ha’u mós la ba lee ida pór ida, tanba ha’u la’ós tenke lee. Ha’u-nia ema sira mak servisu, sira mak halo. Hanesan, sira-ne’ebé tékniku halo mai aprezenta, sira haree dehan lo’os hotu ona, entaun ha’u aprova,” nia dehan.

Atu halo loos ba erru hirak-ne’e, MAPKOMS orienta ona asesór sira hodi haree fila-fali lista jornalista liña frente nia naran, bainhira loos ona mak MAPKOMS haruka pedidu ba Ministériu Finansa hodi halo pagamentu.

“Ita mós servisu hela. Ohin loron sorin balun de’it, ida-ne’e problema mós mai ami. Se loron tomak karik di’ak. Ne’ebé ami halo servisu makaas, tanba lista ne’e barak sira tenke haree ida ba ida. Ne’ebé, jornalista sira labele fuan taridu, osan sei selu,” nia hateten.

Notísia Relevante: Governu konklui suplementu remuneratóriu ba jornalista liña frente hamutuk 216

Jornalista : Nelia Fernandes

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here