Jornalista sira bainhira halo kobertura iha ámbitu luta kontra COVID-19. Imajen Tatoli/Egas Cristovão

DILI, 21 outubru 2020 (TATOLI)--Governu liuhosi konsellu fundu COVID-19 ne’ebé lideradu hosi Ministériu Finansa (MF) konklui ona pagamentu suplementu remuneratóriu ba jornalista sira ne’ebé konsideradu hanesan liña frente, ne’ebé presta serbisu iha ámbitu Estadu Emerjénsia (EE) ligadu ho surtu globál.

Pagamentu suplementu remuneratóriu ba fulan-rua ho montante $97.000 ba jornalista hamutuk 219.

Vise-Koordenadora Sekretariadu Tékniku fundu COVID-19, Regina de Jesus, hateten pagamentu ba jornalista liña frente sira tarde tanba hein baze legál no dadus dahuluk ne’ebé aprezenta ho montante $25 ba kada ema, maibé hafoin diploma sai ninia montante iha mudansa.

“Ohin (kuarta) ami-nia ekipa orsamentu no pagamentu konsege rezolve ona subsídiu ba jornalista, ami transfere ona ba konta bankária ida-idak, bele check ohin ou aban,” Vise Koordenadora ne’e relata ba Agência TATOLI iha ninia knaar fatin, edifísiu Ministériu Finansa, Aitarak-laran, kuarta ne’e.

Notísia Relevante: Suplementu remuneratóriu ba liña frente konklui hotu ona

Nia dehan, bainhira balun seidauk tama iha konta bele informa filafali ba Sekretariadu Tékniku atubele koordena ho banku no buka razaun tanba saida seidauk tama.

Sekretariadu fundu COVID-19 antes ne’e tenke ajusta no haruka lista dahuluk ba filafali Sekretaria Estadu Komunikasaun Sosiál (SEKOMS) atu ajusta tuir diploma.

Koordenadora ne’e esplika, razaun seluk pagamentu tarde tanba bainhira ekipa sira ajusta alokasaun orsamentu ba subsídiu ne’e la to’o atu selu pur volta $97.000, enkuantu orsamentu ne’ebé prevee hosi SEKOMS iha fundu la antisipa katak jornalista sira ne’e to’o ema na’in-216.

Tanba ne’e, ekipa responsável koordena hikas ho instituisaun responsável atubele haree filafali alokasaun, karik iha verba balun maka sufisiente atu muda filafali hodi kompleta orsamentu.

“Ikus mai iha koordenasaun di’ak no pedidu ne’e SEKOMS submete ba Sekretariadu Tékniku iha semana liubá, ho justifikasaun katak ami bele halo alterasaun iha sira-nia orsamentu ne’ebé mak sira la ezekuta,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here