Kordenadór Sekertáriadu Tékniku Fundu COVID-19, Salomão Yoaquim. Imajen TATOLI/Francisco Sony

DILI, 08 abril 2022 (TATOLI)-Koordenadór Sekretariadu Tékniku Fundu COVID-19, Salomão Yoaquim, hateten, Ministéru Finansa haruka fila ona lista liña frente jornalista nian ba Ministériu Asuntu Parlamentár Komunikasaun Sosiál (MAPKOMS) tanba konsidera la tuir baze legál.

“Sekretariadu Tékniku Fundu COVID-19 husu opiniaun jurídiku ba Gabinete Apoiu Jurídiku Ministeriu Finansa (MF) molok prosesa pagamentu suplementu remuneratóriu liña frente ba jornalista sira,” Koordenadór Sekretariadu informa iha Ministériu Finansa, Aitarak-laran, sesta ne’e.

Bazeia ba dekretu-lei númeru 1/2022, 05 janeiru ne’e, iha loron 24 marsu 2022,  MAPKOMS submete pedidu pagamentu mai Sekretariadu Tékniku Fundu COVID-19, ne’ebé ba lista dahuluk kompostu hosi jornalista instituisaun mídia oioin ho totál 288, ne’ebé benefisiáriu ne’ebé indika mós fatin ba halo kobertura no lista ne’e hetan aprovasaun hosi MAPKOMS liuhosi despaixu númeru 01/MAPKOMS/I/2022.

“Tanba lista ne’e iha duplikasaun no balun konta bánkaria benefisiáriu la loos, nune’e Ministériu Finansa devolve filafali ba MAPKOMS hodi hadi’a,” esplika Koordenadór Sekretariadu.

Notísia relevante: PN husu MAPKOMS aselera subsídiu ba jornalista liña frente

Nune’e, iha 28 marsu 2022, MAPKOMS submete filafali lista jornalista sira ba MF atubele prosesa, ne’ebé iha lista daruak ne’e kompostu hosi jornalista instituisaun mídia oioin, ho totál benefisiáriu 507 no totál orsamentu hamutuk $371.400.

“Maibé, lista daruak ne’e la indika fatin ba halo kobertura no laiha despaixu aprovasaun hosi MAPKOMS no lista daruak ho benefisiáriu 507, ne’ebé la’ós de’it jornalista, operadór Kamera no motorista sira , maibé  inklui pesoál administrasaun hanesan aprovizionamentu rekursu umanu, lojístika inklui mós mídia officer Gabinete Ministru Prezidénsia Konsellu Ministru,” nia dehan.

Bazeia ba dispozisaun legál ne’ebé iha, Gabinete Apoiu Jurídiku konklui katak pagamentu subsídiu ba profisionál ne’ebé dezenvolve atividade jornalístika ne’ebé solisita hosi Governu hodi fornese notísia kona-ba COVID-19 durante Estadu Emerjénsia bele de’it atribui bainhira iha despaixu aprovasaun ba lista profisionál ne’ebé dezenvolve atividade jornalístika hosi MAPKOMS, ho baze ba informasaun ne’ebé fornese hosi Sala Situasaun Sentru Nasionál Jestaun Krize (CIGC, sigla portugés) ka hosi Diresaun Nasionál ba Diseminasaun Informasaun MAPKOMS, konforme númeru 3 artigu 2 dekretu-lei númeru 1/2022, 05 janeiru.

Tanba ne’e, atu aselera prosesu pagamentu maka horiseik Sekretariadu Tékniku Fundu COVID-19 haruka ona lista ba MAPKOMS atu foornese despaixu aprovasaun nu’udar lista definitiva, ho respeitu  ba norma ne’ebé regula iha númeru 3 artigu 3 dekretu lei númeru 1/2022 , 05 janeiru nune’e bele fasilirta prosesu pagamentu ho lalais.

“Ministériu Finansa seidauk halo pagamentu ba jornalista liña frente sira tanba bazeia ba dekretu-lei númeru 1/2022, 05 janeiru, kria subsídiu ba profisionál  ne’ebé dezenvolve atividade jornalístika, ne’ebé solisita hosi Governu hodi fornese notísia kona-ba vírus SARS-COV2 durante Estadu Emerjénsia,” Koordenadór Sekretáriu dehan.

Tanba Konforme númeru 1 artigu 2, diploma ne’e, estabelese katak ba profisionál ne’ebé dezenvolve atividade jornalístika hamutuk ho Sala Situasaun Sentru CIGC ka ida ne’ebé Governu husu hodi prodús notísia durante períodu 01 abril to’o 31 dezembru 2021, sei atribui subsídiu pekuniáriu ba kada loron servisu efetivu benefisiáriu nian iha kondisaun direta expozisaun ba vírus SARS-Cov2 durante deklarasaun períodu Estadu Emerjénsia.

Konforme númeru 2 artigu 2, diploma ne’e, subsídiu refere anteriormente iha valór $5 ba kada loron servisu efetivu, nune’e konforme númeru 3 artigu 2, diploma refere, subsídiu ida ne’e bele de’it atribui bainhira iha despaixu aprovasaun lista ba profisionál ne’ebé dezenvolve atividade jornalístika hosi Ministru MAPKOMS ho baze ba informasaun ne’ebé fornese hosi Sala Situasaun SIGC ka hosi Diresaun Nasionál ba Diseminasaun Informasaun MAPKOMS.

Iha tinan 2020, Sekretariadu Tekniku Fundu COVID-19 mós realiza ona pagamentu suplementu remuneratóriu liña frente ba jornalista sira ho totál benefisiárius 216, ho totál orsamentu $97.425 ba períodu fulan-tolu.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here