Ministra Negósiu Estranjeiru no Kooperasaun, Adaljiza Albertina Xavier Magno no ekipa hasai foto hamutuk delegasaun hosi Ministériu Komérsiu Indonézia, hafoin simu vizita kortezia, iha salaun MNEK, Praia dos Coqueiros, segunda (11/04). Imajen TATOLI /Egas Cristóvão

DILI, 11 abril 2022 (TATOLI)—Ministra Negósiu Estranjeiru no Kooperasaun (MNEK), Adaljiza Albertina Xavier Magno, segunda ne’e, konvoka enkontru ho ekipa téknika ministériu no Ministériu Komérsiu Indonézia hodi diskute kle’an liután preparasaun Timor-Leste molok adere ba Asosiasaun Nasaun Sudeste Aziátiku (ASEAN, sigla inglés).

Ekipa sira ne’e kompostu hosi Diretór Asuntu Kooperasaun Ekonomia ba ASEAN, Reprezentante Ministériu Estranjeiru Repúblika Indonézia, Berlianto Situngkir, Ofisiál Servisu Exterior Diresaun Kooperasaun Ekonomia ba ASEAN, Ivan Numanto, no Negosiadór Komérsiu iha Ministériu Komérsiu, Andri Gilang Nugraha Ansari.

Ministra Negósiu Estranjeiru no Kooperasaun, Adaljiza Albertina Xavier Magno. Imajen TATOLI /Egas Cristóvão

“Sira hosi Indonézia halo vizita kortezia mai ha’u, sira hanesan grupu tékniku hosi nível diretór ne’ebé Governu Indonézia haruka mai. Ha’u kontente tebes hakarak simu sira tanba ida-ne’e importante tebes, sira mai ko’alia ho ita-nia tékniku hodi haree prosesu preparasaun Timor-Leste durante tinan barak ba adezaun ASEAN inklui atu identifika asisténsia saida mak sira bele ajuda no fó konsellu, ajuda ita bele aselera prosesu ne’e tanba tinan oin sira mak sei kaer sira-nia Prezidénsia ne’ebé foti hosi Cambodia,” Ministra Adaljiza hateten hafoin simu ekipa sira iha salaun enkontru MNEK, segunda ne’e.

Notísia relevante: Filomeno Aleixo nomeadu nu’udar Embaixadór extraordinária no Plenipotensiáriu Timor-Leste ba ASEAN

Tuir governante ne’e, Timor-Leste sei presiza ajustamentu buat barak, liuliu iha área komérsiu.

“Área ne’e asuntu no lejizlasaun barak inklui iha ejizensia ne’ebé presiza halo hodi bele adapta ba progresu ne’ebé asosiasaun iha ona. Nasaun na’in-10 sira kuaze iha modelu komérsiu avansadu tebes iha mundu no kuaze ho modelu free trade di’ak tebes, entaun ita tenki prepara-an hodi adapta, ida-ne’e maka halo prosesu tarde,” nia akresenta.

Ministra Negósiu Estranjeiru no Kooperasaun, Adaljiza Albertina Xavier Magno no ekipa simu vizita kortezia hosi delegasaun Ministériu Komérsiu Indonézia, iha salaun MNEK, Praia dos Coqueiros, segunda (11/04). Imajen TATOLI /Egas Cristóvão

Enkuantu, progresu servisu Timor-Leste hodi adere ba ASEAN maka Governu halo serbisu barak ona hanesan dadaun prepara atu finaliza konstrusaun Portu Tibar no aprova konvensaun oioin hodi ajuda planu halo komérsiu ho país sira seluk.

Notísia relevante: Jerente Timor Port espera konstrusaun fíziku Portu Tibar termina iha novembru 2022

Aleinde ne’e prepara rekursu umanu, lejizlasaun no adapta preparasaun téknika ne’ebé maka sai ejizensia maka’as ba adezaun.

“Hafoin reuniaun ho ekipa ne’e, ha’u ho esperansa boot tanba sira maka baibain apoia ita no sira mak uluk fó dalan ba ita hodi submete ita-nia proposta adezaun, sira sempre iha ita-nia sorin. Tanba ne’e maka sira haruka sira-nia ekipa espesiál ida mai halo levantamentu hodi haree saida mak sira bele fó asistensia hodi aselera prosesu,” Ministra tenik.

Ministra Negósiu Estranjeiru no Kooperasaun, Adaljiza Albertina Xavier Magno no ekipa simu vizita kortezia hosi delegasaun Ministériu Komérsiu Indonézia, iha salaun MNEK, Praia dos Coqueiros, segunda (11/04). Imajen TATOLI /Egas Cristóvão

Hafoin reuniaun ho MNEK, delegasaun ne’e halo vizita ba Ministériu Koordenadór Asuntu Ekonómiku (MKAE), Ministériu Turizmu, Komérsiu no Indústria (MTKI), TradeInvest, Banku Dezenvolvimentu Aziátiku (ADB, sigla ingles), Portu Tibar, no Sekretaria Estadu Kooperativa (SEKoop).

ASEAN harii hosi nasaun lima hanesan Indonézia, Filipina, Malázia, Singapura, Tailándia, iha loron 08 agostu 196 iha Bangkok, Tailándia.

Daudaun ne’e nasaun ne’ebé halibur iha ASEAN mak nasaun na’in-lima ne’ebé hanesan fundadór asosiasaun inkluiBrunei Darusalam, Vietname, Laos, Myanmar, no Kamboja.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here