Progresu konstrusaun Portu Baía Tibar. sesta (01/04). Imajen TATOLI/Francisco Sony

LIQUIÇÁ, 01 abríl 2022 (TATOLI)—Ekipa hosi Timor Port S.A ne’ebé hanesan responsável ba konstrusaun Portu Baía Tibar, sesta ne’e, simu vizita hosi liña ministeriál hodi haree ba progresu projetu ne’ebé tuir planu sei ramata iha tinan ne’e nia-laran.

Diretór Ezekutivu Portu Baía Tibar, Rafael Ribeiro. Imajen TATOLI/Francisco Sony

“Espera konstrusaun fíziku ramata iha agostu no setembru nia-laran, tanba daudaun ne’e atinje ona 75%, iha outubru ka novembru 2022 ne’e hotu-hotu kompletu ona no ita bele halo teste, nune’e bele tama no simu sasán hosi portu Dili mai Tibar,” Diretór Ezekutivu Timor Port S.A, Rafael Ribeiro, hateten iha Portu Tibar, munisípiu Liquiçá.

Notísia relevante: Governu halo revizaun tarifa kobransa ba utilizadór Portu Tibar

Maski nune’e, responsável ekipa traballu ne’e rekoñse durante konstrusaun sempre mosu dezafiu, liuliu kondisaun COVID-19 fó impaktu boot ba determinasaun tempu konstrusaun no projetu la’o tarde.

“Tanba tékniku sira mai hosi Xina, ne’ebé bainhira mosu COVID-19 entaun balun mai no balun mai tarde, no COVID-19 ne’e mós afeta ba lojístiku Supply Chain, entaun sasán balun mai tarde, maibé daudaun ne’e ita-nia serbisu la’o hela,” nia akresenta.

Vise-Ministru Finansa, António Freitas. Imajen TATOLI/Francisco Sony

Iha biban hanesan, Vise-Ministru Finansa, António Freitas, hateten, razaun mai vizita ho liña ministeriál mak atu haree direta progresu konstrusaun fízika no dezafiu.

“Entaun ohin ita-nia vizita atu haree katak kontrusaun portu ne’e antinje ona 75%. VIII Governu ne’ebé lidera hosi Primeiru-Ministru, Taur Matan Ruak, orienta Ministériu Finansa atu hakbesik ba projetu ne’e, tanba projetu ne’e rasik aplika hanesan Parseria Públiku-Privada (PPP) dahuluk iha Timor-Leste, nune’e bainhira ida-ne’e hetan ona susesu tuir mai, mak sei lori imajen di’ak ba Governu no Estadu, no konfiansa setór privadu ba ita sei boot,” nia dehan.

Nune’e, vizita hanesan hosi liña ministeriál sei kontinua to’o tranzisaun portu hosi Dili mai Tibar.

Entidade hosi liña ministeriál halo vizita ba fatin konstrusaun Portu Baía Tibar hodi haree progresu no dezafiu sira, sesta (01/04). Imajen TATOLI/Francisco Sony

Vizita hosi liña ministeriál ne’e kompostu hosi entidade Ministériu Obras Públika, (MOP) , Eletricidade de Timor-Leste, Empreza Públika (EDTL, E.P) Bee Timor-Leste, (BTL), Diresaun Nasionál Estrada, Ponte Kontru Seiu (DNEPCC, sigla portugés), Ministériu Transporte komunikasaun (MTK) liuhosi Autoridade Portuária Timor-Leste (APORTIL).

Iha loron 30 agostu 2018, Primeiru-Ministru, Taur Matan Ruak, halo lansamentu ba konstrusaun Portu Tibar no tuir planu finaliza konstrusaun iha maiu 2022.

Progresu konstrusaun Portu Baía Tibar. sesta (01/04). Imajen TATOLI/Francisco Sony

Konstrsaun Portu Tibar, lokaliza iha kilómetru 10 husi Oeste Dili, iha Portu Baía Tibar, hanesan infraestutura prioritária ne’ebé indentifika ona iha Planu Estratéjiku Dezenvolvimentu Nasionál (PED) 2011-2030.

Projetu ne’e hanesan konstrusaun nível internasionál, ne’ebé ezekuta liuhosi Timor-Port S.A ho modalidade PPP, ne’ebé halo konsórsiu ho Bolloré no Governu Timor-Leste.

Ba konstrusaun ne’e, Governu aloka millaun $130, enkuantu Timor Port no Bolloré hamutuk millaun $140, totál millaun $270 ba faze inísiu.

Enkuantu, totál investimentu orsamentu ba Portu Tibar to’o tinan 30 ho valór millaun $500.

Jornalista : Arminda Fonseca

Editora : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here