Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (29/12). Imajen TATOLI/Francisco Sony

DILI, 02 fevereiru 2022 (TATOLI)—Governu liuhosi reuniaun Konsellu Ministru, kuarta ne’e, nomea Filomeno Aleixo da Cruz, nu’udar Embaixadór Extraordinária no Plenipotensiáriu Repúblika Demokrátika Timor-Leste ba Asosiasaun Nasaun Sudeste Aziátiku (ASEAN, sigla inglés), iha Jakarta, Indonézia.

Projetu ne’e aprezenta hosi Ministra Negósiu Estranjeiru no Kooperasaun, Adaljiza Albertina Xavier Reis Magno.

“Filomeno Aleixo da Cruz daudaun ne’e nu’udar Embaixadór Timor-Leste iha Jakarta atu nia sai mós Timor-Leste nia embaixadór extraordinária no plenipotensiáriu ba ASEAN ne’ebé maka nia sede mós iha Jakarta,” Ministru Prezidénsia Konsellu Ministru, Fidélis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.

Notísia relevante: Ohin, MNEK bá Cambodia diskute adezaun TL ba ASEAN

Nune’e, bainhira iha futuru Timor-Leste sai membru ASEAN ona maka sei haree fali reprezentasaun.

Antes ne’e, hahú tinan 2011 Timor-Leste hato’o pedidu adezaun ba ASEAN, maibé to’o ohin loron seidauk konsege.

Ministériu Negósiu Estranjeiru no Kooperasaun (MNEK) kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun.

Alende ne’e, halo mós elaborasaun dokumentu Rejime Komérsiu Externu no enkuadramentu legál sira.

ASEAN kompostu hosi nasaun 10, kompostu, Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here