Estudante Eskola Sekundáriu São Pedro Comoro, partisipa ezame nasionál. Imajen TATOLI/Jogerjo Guterres

DILI, 04 marsu 2022 (TATOLI)–Diretór Servisu Edukasaun Dili (DSED) sesante, Duarte Braganza, asina ona diploma estudante finalista hosi eskola ualu tanba simu despaixu hosi Ministériu Edukasaun Juventude no Desportu (MEJD) númeru 13/GM-MEJD/III/2022.

“Ha’u hetan delegasaun kompeténsia hodi asina diploma estudante sira bazeia ba despaixu ministeriál, maibé ha’u dúvida hela ho despaixu MEJD nian, tanba Komisaun Funsaun Públika (KFP) maka halo ezonerasaun mai ha’u, loloos atu delega responsabilidade mai ha’u hodi asina diploma estudante nian tenke iha mós despaixu ida tan hosi Prezidente KFP,” Diretór sesante informa ba Agência TATOLI, via telefónika, segunda ne’e.

Notísia relevante: KFP husu DSED sesante asume responsabilidade asina diploma estudante

Eskola ualu ne’ebé asina ona diploma mak hanesan Eskola Canossa Has-laran, Externato São José, Eskola Ensinu Sekundáriu Jerál (ESJ) Heroi da Pátria, Eskola ESJ 20 Setembru Metinaro, Eskola São Francisco Dare, Semináriu Menór Fatumeta, Eskola ESJ São Miguel Comoro, no Eskola Paulo VI.

Tuir Duarte Braganza, loloos presiza iha karta formál hosi Prezidente KFP hodi fortifika serbisu ne’ebé nia halo.

“Ha’u asina ho laran ta’uk, tuir loloos molok atu delega kompeténsia asina diploma estudante, KFP tenke halo uluk restituisaun no legalizasaun ba funsionáriu baibain ida molok hala’o serbisu dirijente balun nian. Provizóriamente ha’u-nia pozisaun hanesan diretór tanba hala’o hela serbisu asina diploma estudante sira nian. Tanba ne’e, KFP tenke garantia knaar ne’ebé maka ha’u halo daudaun ne’e, bainhira fó serbisu no responsabilidade labele haluha mós direitu ha’u-nia ba fulan-novembru no dezembru,” nia akresenta.

Duarte Braganza dehan, ba oin bainhira iha problema ruma iha prosesu ezame nasionál inklui diploma, lahatene sé mak atu responsabiliza, Diretór atuál ka diretór sesante, tanba nia konsidera kontíudu diploma la klaru.

“Bainhira maka funsionáriu baibain ida bele asina fali dokumentu Estadu nian ne’ebé atu garante estudante 16.105 ninia futuru, ne’e duni hanesan funsionáriu baibain ha’u lakohi atu foti risku, ho nune’e husu ho respeitu atu KFP bele intende didi’ak kestaun ne’e,” nia tenik.

Notísia relevante: Bankada PLP kontinua ezije MEJD solusiona estudante finalista sira-nia diploma

Diretór sesante ne’e admite, simu karta ho kuntíudu delega de’it kompeténsia ba funsionáriu, la temi diretór sesante.

“Tanba ne’e ha’u dúvida atu asume responsabilidade hodi asina dokumentu ne’e,” nia salienta.

Antes ne’e, Prezidente KFP, Faustino Cardoso, husu ba Diretór Servisu Edukasaun Munisípiu Dili sesante, Duarte Braganza, atu kontinua asume responsabilidade asina diploma estudante finalista sira, tanba konsidera iha responsabilidade ba asaun ka aktu administrativa ne’ebé hala’o durante períodu responsabilidade ninian, maski la asume ona kargu.

Diretór Servisu Edukasaun munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran.

Mandatu Duarte Braganza lolos termina iha loron loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva nu’udar Diretór Servisu Edukasaun Munisípiu Dili foun.

Ba tinan akadémiku 2021, iha estudante finalista na’in-21.567 mak termina ona estudu iha nível Sekundáriu Jerál no Tékniku Vokasionál.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here