Jornalista Agência TATOLI, Tomé Amado, halo entrevista ho Prezidente KFP, Faustino Cardoso, iha edifísiu KFP, Matadouro, segunda (28/03). Imajen TATOLI/Nelson de Sousa

DILI,28 marsu 2022 (TATOLI)–Prezidente Komisaun Funsaun Públiku (KFP) Faustino Cardoso husu ba Diretór Servisu Edukasaun Munisípiu Dili (DSED) sesante, Duarte Braganza, atu kontinua asume responsabilidade hodi asina diploma estudante finalista sira, maski la asume ona kargu no hanesan funsionáriu baibain.

“Bainhira ema ida asume kargu, sé de’it, nia iha responsabilidade ba asaun ka aktu administrativa ne’ebé hala’o durante períodu responsabilidade ninian, maski la asume ona kargu. Sé kazu ne’e akontese dezde tempu nia sei asume kargu, signifika sei iha ninia responsabilidade, maski nia la asume ona kargu ne’e, maibé nia tenke asume responsabilidade no responsabilizasaun,” Prezidente KFP informa ba Agência TATOLI, iha edifísiu KFP, Matadouro, segunda ne’e.

Antes ne’e, Diretór Servisu Edukasaun munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran, tanba ne’e daudaun Ministériu Edukasaun Juventude no Desportu (MEJD) halo hela aprosimasaun ho Diretór Edukasaun munisipál sesante na’in-lima atu asina diploma estudante finalista.

Ba tinan akadémiku 2021, iha estudante finalista na’in-21.567 mak termina ona estudu iha nível Sekundáriu Jerál no Tékniku Vokasionál, maibé to’o agora seidauk hetan diploma formál.

Notísia relevante: Diploma estudante finalista sekundáriu seidauk hetan asina hosi Diretór Servisu Edukasaun

Tuir Faustino Cardoso, sistema kontrolu internu iha ona, hanesan inspesaun jerál no auditoria hosi MEJD hodi ba haree situasaun ne’e ho didi’ak no tenke hatuur loloos tuir nia fatin, no tenke hola medida loloos hodi husu responsabilidade no ezije responsabilizasaun, tanba kestaun ne’e la presiza despaixu hosi KFP.

“Responsabilidade no responsabilizasaun ne’e buat rua la hanesan. Responsabilidade katak atu halo tuir obrigasaun sira ne’ebé iha ona, enkuantu esponsabilizasaun atu hatán ba razaun tanba saida mak nia la asina sertifikadu, ne’ebé sé mak atu haree ida-ne’e mak Ministériu Edukasaun Juventude no Desportu,” nia akresenta.

Biban ne’e, Prezidente KFP mós husu entidade ne’ebé sente prejudikadu ka sai vítima hosi prosesu responsabilidade, bele hato’o keixa mai KFP.

“Komisaun sei hola medida atu husu responsabilizasaun ba aktu ne’ebé ho hakarak duni, kuandu kazu ne’e mak tama duni iha KFP, ita sei buka hatuur loloos tuir lia loos no halo investigasaun ho loloos,” nia tenik.

Maibé molok to’o KFP, Faustino Cardoso husu inspetoria no auditoria hosi MEJD atu halo investigasaun ba kazu ne’e hodi buka hatuur loloos solusaun no ezije responsabilizasaun karik identifika mosu irregularidade ruma ne’ebé komete hosi sé de’it mak iha tempu ne’ebá asume responsabilidade.

Antes ne’e, Diretór Servisu Edukasaun munisípiu Dili sesante, Duarte Braganza, hateten, nia parte prontu asina diploma estudante finalista sira, maibé presiza karta formál hosi KFP, atu nune’e bele hetan lejitimidade, tanba daudaun nia nu’udar funsionáriu baibain.

“Ha’u hetan ezonerasaun hosi kargu nu’udar Diretór molok realiza ezame nasionál ba estudante sira. Karik ha’u bele asina diploma sira ne’e bainhira hetan despaixu hosi KFP, maibé kuandu laiha despaixu ha’u sei la asina,” nia dehan.

Mosu fallansu hosi mudansa kompeténsia

Ba kestaun ne’e, Ministru Edukasaun Juventude no Desportu, Armindo Maia, konsidera diploma estudante finalista 2021 nian to’o agora seidauk asina tanba mosu fallansu hosi mudansa kompeténsia.

“Diploma ba estudante finalista to’o agora seidauk bele asina tanba mosu fallansu ne’ebé akontese hosi mudansa kompeténsia hosi diretór tuan ba fali diretór foun, maibé ha’u ko’alia ona ho nia eis diretór Duarte Braganza atu asina hela diploma sira ne’e,” Ministru dehan iha Palásiu Governu foin lalais ne’e.

Governante ne’e esplika, mandatu loloos eis Diretór Braganza sei to’o loron 31 dezembru 2021, maibé tanba mosu desizaun polítika, MEJD hasai despaxu ezonerasaun iha loron 31 outubru 2021 hodi nomeia fali Carlito da Silva nu’udar Diretór Servisu Edukasaun Munisípiu Dili foun, tanba ne’e mandatu eis Diretór Braganza ramata molok estudante sira iha Dili hala’o ezame nasionál, tanba ne’e nia lakohi foti risku atu asina diploma estudante sira.

Hosi parte MEJD prepara diploma no parte eskola prienxe ona diploma estudante sira, agora ministériu entrega ba Diretór sesante atu asina diploma.

“Durasaun tempu ne’ebé akontese iha tinan kotuk ne’e maka hamosu fallansu boot ne’ebé halo diploma estudante sira nian balun tau fali naran Diretór foun no balun tau fali eis Diretór nia naran. Tanba ne’e, ministériu esforsu hodi rezolve hodi husu ba diretór sesante fó nafatin ninia kontribuisaun hodi asina nafatin diploma sira ne’e, maski la’ós ona hanesan Diretór,” Ministru dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here