DILI, 04 marsu 2022 (TATOLI)—Vise Prezidente Komisaun Nasionál Eleisaun (CNE-sigla portugés), Domingos Barreto, hateten CNE deside kampaña eleitorál ba eleisaun presidensiál segunda volta sei ramata iha 13 abríl 2022.
Notísia Relevante: Don Virgílio: “kampaña tenke nafatin konserva sakralidade semana santa”
“Ami deside kampaña eleitorál ba segunda volta sei ramata iha 13 abríl, tanba bazea ba rezultadu enkontru ho kandidatu PR na’in-rua no karta hosi Arsebispu Arkidioseze Dioseze Dili ne’ebé husu atu kampaña to’o de’it iha loron refere ne’e, la viola regra ruma,” Domingos Barreto hateten ba Agência TATOLI, via telefónika, segunda ne’e.
Vise Prezidente CNE ne’e apela ba komunidade hotu-hotu liu-liu kandidatu PR na’in rua katak liga ho semana santa atu labele insulta malu no hasai liafuan kro’at ba malu, maibé halo kampaña presiza mós tenke halo reflesaun hanesan ema sarani iha semana santa paskua nian.
Antes ne’e Primeiru- Ministru (PM), Taur Matan Ruak, simu ona karta hosi igreja katólika atu husu Governu muda oráriu kampaña segunda volta ba Eleisaun Prezidensiál 2022 hosi Kandidatu Prezidente Repúblika (PR) na’in-rua, José Ramos Horta no Francisco Guterres Lú Olo, tanba iha loron 14 abríl ne’e tamana ona semana santa paskua nian.
“Kandidatura sira nu’udar katólika mak tenke respeita de’it regra, tanba kuandu muda ne’e labele. Konserteza loron 14 to’o 15 ema hotu la halo kampaña, ha’u rasik ba kampaña ne’e mós sei la halo, ha’u sei deskansa,” Taur hateten.
Nune’e mós Kandidatu Prezidente Repúblika na’in-rua ne’ebé sei kompete iha eleisaun segunda volta ne’e mós deside atu presiza respeita atividade igreja nian liu-liu iha semana santa ne’e hodi la realiza sira-nia kampaña eleitorál.
Antes ne’e, tuir kalendáriu ne’ebé fó sai hosi Komisaun Nasionál Eeleisaun (CNE, sigla portugés) kampaña ba segunda volta sei hahú iha 02 abríl no sei konklui iha 16 abríl 2022.
Notísia Relevante: CNE indika RTTL, E.P halo transmisaun direta debate públiku ba kandidatu PR
Jornalista : Osória Marques
Editór : Cancio Ximenes
