Arsebispu Arkidioseze Metropolitana Dili, Don Virgílio do Carmo da Silva. Imajen TATOLI/Egas Cristóvão

DILI, 02 abríl 2022 (TATOLI)–Arsebispu Arkidioseze Metropolitana Dili, Don Virgílio do Carmo da Silva, husu ba kandidatu Prezidente Repúblika (PR) na’in-rua ne’ebé halo kampaña prezidensiál segunda volta hahú loron 02 to’o 16 abríl 2022, atu nafatin konserva sakralidade semana santa.

“Ha’u hakarak husu uluk ba povu sarani katóliku hotu, atu iha tempu kampaña labele husik tempu semana santa liu de’it, tanba momentu ne’e dala-ida de’it iha tinan ida ida nia-laran, tanba ne’e tenke nafatin konserva sakralidade iha semana santa,” Don Virgílio hateten iha seremónia inagurasaun gruta Universidade Dili (UNDIL), iha Mascareñas, sábadu ne’e.

Notísia relevante: Eleisaun segunda volta: Don Virgílio husu Parpol tane aas povu nia interese

Nia konsidera, iha tempu semana santa ne’e iha eventu importante rua maka presiza konserva ninia sakralidade iha sesta no sábadu.

“Sesta santa tenke hanoin kona-ba Maromak nia mate, entaun ema hotu tenke nonok, maibé kuandu tempu ne’e mak ema halo kampaña ka barullu bele dehan momentu lulik ne’e lakon duni. Loron seluk mak iha sábadu santu, atu hanoin kona-ba Jesus nia moris hias  (resureisaun),” Don irgílio fó hanoin.

Tanba ne’e, Arsebispu husu sarani katólika iha territóriu nasionál atu iha konsiénsia, maski ámbitu kampaña nu’udar liberdade.

“Nu’udar sarani atu la husik momentu grasa Na’i Maromak la’o liu le’et de’it hosi ita. Husu nafatin ba militante no simpatizante partidu sira hotu ne’ebé fó apoiu ba kandidatu na’in-rua ne’e mesak sarani katólika oan de’it, bainhira partisipa iha kampaña hodi ezerse liberdade, labele haluha identidade nu’udar sarani loloos, tanba ne’e momentu grasa,” nia tenik.

Ba kandidatu na’in-rua ne’ebé halo kampaña segunda volta, maski lei fó dalan ba liberdade, maibé Don Virgílio husu atu nafatin iha ambiente sagradu no lulik semana santa, nune’e bele sai ambiente di’ak ba povu, liu-liu sarani hotu atu labele hakanek malu, sadik malu no hatún malu ho lia fuan kro’at sira.

“Husu kandidatu na’in-rua atu tau-an iha tempu kampaña ne’e ho hakmatek hodi labele influénsia povu kiik sira ba hanoin ne’ebé ladi’ak, maibé buka atu lori sarani sira ho hanoin nafatin loron importante semana santa ne’e iha sira-nia moris,” Arsebispu apela.

Iha sorin seluk Don Virgílio admite katak kondisaun kampaña iha semana santa bele prejudika kosentrasaun sarani sira, tanba ne’e antes ne’e Konferénsia Episkopál Timorense halo duni karta ida hodi dirije ba Prezidente Repúblika, Governu, Tribunál Rekursu, no Komisaun Nasionál Eleisaun (CNE, sigla portugés) atu husu konsiderasaun hodi tetu tempu kampaña iha semana santa ne’e.

“Tanba Páskua mak festa boot liu ona ba sarani katólika hodi hanoin momentu semana santa Kristu nia terus, mate no moris hias. Ami halo karta hodi husu tetu se bele halo mudansa iha oráriu kampaña, maibé liu loron ruma ami simu resposta katak kalendáriu hakerek ona iha lei ne’ebé Parlamentu Nasionál halo ona iha tinan ida liubá. ne’ebé orgaun a’as sira labele halo mudansa ba kalendáriu,” nia haktuir.

Notísia relevante: Xefe Governu husu Kandidatu PR respeita loron Páskua

Ho nune’e, Don Virgílio husu ba entidade hotu, bainhira partisipa iha kampaña karik kuidadu-an no kontinua respeita malu nafatin hodi konserva eventu semana santa ho di’ak liután.

Bazeia ba dadus hosi Sekretariadu Tékniku Administrasaun Estatál (STAE) no CNE, iha eleisaun primeira volta, Kandidatu PR, José Ramos Horta ho votu 301.481 (46,58%), enkuantu Kandidatu PR, Francisco Guterres ‘Lú Olo’ ho votu 143.408 (22,16%) hosi totál votu válidu 647.172 iha territóriu tomak, nune’e kandidatura rua ne’e kompete iha eleisaun segunda volta.

Jornalista : Tomé Amado

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here