iklan

HEADLINE, SEGURANSA

UPF detein Timoroan na’in-rua importa manu madena ilegál

UPF detein Timoroan na’in-rua importa manu madena ilegál

UPF sunu evidénsia ka manu-madena ne’ebé Timoroan na’in-rua importa ilegál hosi Indonézia mai Timor-Leste. Imajen/espesiál

DILI, 03 abril 2022 (TATOLI)— Polísia Nasionál Timor-Leste (PNTL), liuhosi Unidade Patrullamentu Fronteira (UPF), detein Timoroan na’in-rua ne’ebé tenta hala’o importasaun  manu-madena ilegál hosi Atambua, Nusa Tenggara Timur (NTT)-Indonézia.

Komandante UPF, Superintendente Euclides Belo, informa liuhosi patrullamentu ne’ebé membru UPF hala’o konsege detein sidadaun timoroan na’in-rua ne’ebé importa manu-futu ilegál hamutuk 26 hosi Indonézia mai iha Timor-Leste.

“Iha sábadu loron 2 marsu, maizumenus 02:00, madrugada, ekipa UPF liuhosi patrullamentu iha liña fronteira Batugade konsege detein sidadaun timoroan nain-rua ho insiál AM no AJ, tanba hatama manu-futu no manu madena hamutuk 26 hosi Indonezia mai Timor-Leste liuhosi dalan ilegál,” Komandante UPF ne’e hateten ba Agência TATOLI, via rede sosiál, domingu ne’e.

Notísia relevante:UPF kontinua vijilánsia iha fronteira

Manu-madena ne’ebé UPF halo apreensaun iha fronteira Batugade tanba importa ilegál. Imajen/espesiál

Hafoin membru UPF detein tiha sidadaun timoroan nain rua ne’e iha Fronteira Batugade, membru sira mós halo kedan apreensaun ba evidénsia sira ne’ebé maka suspeitu sira lori hanesan manu-futu no madena hamutuk 26.

“Evidénsia sira ne’e ami sunu tiha de’it ho razaun tanba sira hatama tuir dalan illegal no suspeitu nain-rua ne’e, UPF haruka fila kedan mai Dili hafoin halo tiha identifiksaun ba sira.” nia akresenta.

Hataan Kona-ba situasaun iha liña fronteira, Komandante UPF ne’e, hateten situsaun iha liña fronteira kontroladu tanba iha kordenasaun ho Komandante Munisípiu Covalima no Suai.

“Situasaun iha liña fronteira kontroladu tanba parte komandu tolu hanesan Komandu Munisípiu Covalima no Bobonaro iha kooperasaun di’ak tebes ho UPF,” Superitendente Euclides konklui.

Notísia relevante: UPF detein sidadaun 22 hakat fronteira ilegál

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!