Komandante Unidade Patrullamentu Fronteira, Superintendente Euclides Bello. Imajen espesial.

BOBONARO, 08 dezembru 2021 (TATOLI) – Polísia Nasionál Timor-Leste (PNTL) liuhosi Unidade Patrullamentu Fronteira (UPF) durante fulan-novembru nia laran detein sidadaun timór-oan na’in-22 hakat fronteira ho dalan ilegál.

Komandante Unidade Patrullamentu Fronteira, Superintendente Euclides Bello, informa, sidadaun hirak-ne’e maoria estudante sira halo estudu iha Indonezia ne’ebe viza no pasaporte mate.

Hosi númeru ne’e inklui mós sidadaun ne’ebé halo atividade tranzasaun ilegál no atividade kultura iha rai rua nian.

“Hahú hosi loron 01 to’o loron 30 fulan-novembru nia laran, ita konsege kaptura sidadaun na’in 22. Sira-ne’e komete krime dezobedénsia, krime ida kontra bandu, sira-ne’e ita entrega ba postu Batugade depois lori ba iha parte saúde nian atu sira kumpre kuarentena,” nia informa ba jornalista sira, iha Kuartél UPF, Nú-Badak, suku Batugade, tersa ne’e.

Durante fulan-novembru, UPF halo apreensaun ba sasán kontrabandu sira hanesan, motorizada  ho marka vixion ida, fahi-oan rua, ayam potong kaixa rua, motorizada scopy ida, fogete pakote 127, sigarru surya slop 373, sigaru pohon sagu no tabaku karton pakote hitu no mina-rai litru 40.

Entretantu sasán kontrabandu hirak ne’e dadaun ne’e,UPF entrega ona ba iha parte imvestigasaun kriminal komando munisípiu Bobonaro ne’ebe mak iha kompetensia iha area Juridisaun hodi prosesa ba Ministériu Públiku.

“Sasán sira-ne’e ita halo apreensaun iha área fronteira ne’ebé sai risku ba atividade tranzasaun ilegál hanesan iha Alto Lebos, Tapo-Memu no iha área Batugade ninian,” nia afirma.

Atu halo vijilánsia másima iha liña fronteira metin liután, daudaun ne’e UPF konstrui hela postu rua iha suku Batugade, postu administrativu Balibo ne’ebe ninia atinjimentu to’o ona 80, ida seluk foin mak 20%. Enkuantu postu ida iha suku Cowa ne’ebe ninia konstrusaun atinje 15%.

Totál postu permanente UPF kompañia Alfa ne’ebé destaka iha fronteira área jurídika munisípiu Bobonaro hamutuk 13, maibe tuir planu sei aumenta mós postu vijilánsia hamutuk sia (9) iha fronteira Covalima no Rejiaun Administrativu Espesial Oe-ecuse Ambeno (RAEO).

“Espera katak ho hari postu foun sira-ne’e ho sensiblizasaun informasaun ne’ebe ita halo ba komunidade sira iha fronteira bele sivilizadu hodi kumpre ita-nia lei rasik,” nia fundamenta.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here