Komandante Unidade Patrullamentu Fronteira (UPF), Superintendente Euclides Belo, hala’o vizita ba postu fronteira Saburai, Bobonaro. Imajen Tatoli/Sérgio da Cruz.

DILI, 18 fevereiru 2022 (TATOLI) – Komandu Unidade Patrullamentu Fronteira (UPF) lideradu komandante Euclides Belo, kontinua vijilánsia iha área fronteira hodi kontrola atividade tranzaksaun no movimentasaun ilegál.

Komandante UPF, Superintendente Euclides Bello, informa, daudaun ne’e koordena ona ho komandante munisípiu sira, liuliu minisípiu Bobonaro, Covalima no Rejiaun Administrativa Espesiál Oe-Cuse Ambeno (RAEOA) ne’ebé jeografikamente baliza ho Indonézia hodi tau forsa hamutuk asegura fronteira sai fatin seguru ba ema hotu.

“UPF iha liña fronteira la’ós de’it garante ba movimentu ilegál, maibé ami garante seguransa ba ita-nia sidadaun sira, atu sidadaun sira bele hadomi ita-nia rai no pátria, maske ke fronteira ne’e ita laiha lutu ne’ebé mak bele sá tán netik ita sai ba Indzonézia ka bele  mai ita-nia rai,” Superintendente ne’e informa ba jornalista sira, iha Badut Mean, suku Cowa, postu administrativu Balibo, kinta ne’e.

Euclides hatutan, komandu mós iha ona planu atu halo edukasaun sívika ba komunidade sira-ne’ebé hela besik liu iha liña fronteira, atu nune’e bele konsiensializa komunidade sira.

“Sé de’it mak atu hasoru malu, maske relasaun família maibé tenke iha autorizasaun no hosi autoridade seguransa nian, ligadu ba movimentu ema-nia atu sai iha dalan legál ne’e serbisu migrasaun nian, maibé ida liuhosi dalan sira-ne’ebé la apropriadu ita konsidera ne’e ilegál no kaptura hodi prosesu tuir lei,” nia afirma.

Membru UPF ne’ebé hala’o vijilánsia iha fronteira hosi kompañia CARLIE Oe-cuse no kompañia ALFA Bobonaro la rejista kazu atividade tranzaksaun ilegál.

Maibé iha loron  kinta (17/02) ne’e membru UPF hosi kompañia (BRAVO) Covalima detein sidadaun ida halo atividade tranzaksaun ilegál ba tabaku marka (SEK) saku lima ne’ebé tenta hatama mai territóriu Covalima maibé la konsege tanba UPF halo kedas apreensaun.

Daudaun ne’e UPF entrega ona sidadaun ne’e ba iha parte seksaun investigasaun kriminál, komandu polísia munisípiu Covalima, atu kontinua halo prosesu identifikasaun, hodi submete ba Ministériu Públiku (MP) nu’udar na’in ba penál atu loke prosesu investigasaun tuir lei ne’ebé vigora iha Timor-Leste.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here