Arsebispu Arkidioseze Metropolitana Dili, Don Virgílio do Carmo da Silva. Imajen Tatoli/ Egas Cristovão.

DILI, 25 marsu 2022 (TATOLI)—Arsebispu Arkidioseze Metropolitana Dili, Don Virgílio do Carmo da Silva, SDB, husu ba partidu polítiku (Parpol) no militante kada partidu atu tane aas povu nia interese iha eleisaun prezidensiál segunda volta.

Notísia Relevante: Don Virgílio: “Tempu kuarezma presiza halo di’ak la’ós halo propaganda”

“Posibilidade ba segunda votasaun, ne’e hanoin ita hotu haree hosi primeira votasaun ne’e kampaña la’o kapaas. Maske mosu buat ruma maibé en jerál la’o di’ak. Entaun, ita mós iha esperansa hanesan, ne’ebé hein katak iha kampaña no tama ba votasaun daruak nian mós ita-nia polítiku, militante no simpatizante kada partidu nian buka nafatin atu tane aas povu rai Timor nia interese, hodi ita hatudu nafatin ba mundu kona-ba demokrásia,” Don Virgílio do Carmo da Silva hateten ba jornalista sira, hafoin ordenasaun saserdotál ba diákonu na’in-rua no ordenasaun diakonál ba frater na’in-ida, iha Igreja Katedrál Dili, sesta ne’e.

Tanba, Don Virgílio hateten, Timor-Leste hatudu daudaun maturidade nu’udar nasaun ida-ne’ebé ki’ik maibé bele kontribui ba mundu, oinsá Timor-Leste hala’o nia eleisaun ne’ebé eme hosi rai seluk mós komesa fó apresiasaun.

“Ida-ne’e tanba ita-nia maturidade no tanba ita hakas an atu respeita malu, rona malu no simu malu, liu-liu simu realidade hosi rezultadu saida de’it mak mosu, tanba ita hakaas an atu simu ho fuan no laran saida de’it mak povu determina,” nia dehan.

Tuir kalendáriu eleitorál ne’ebé CNE fó sai katak eleisaun segunda volta ne’e sei hala’o iha semana oin iha loron 02 abríl hodi hahú hala’o kampana eleitorál, nune’e iha 19 abril sei hala’o votasaun.

“Maibé, agora ita hotu sei hein rezultadu hosi apuramentu ne’ebé agora daudaun halo iha sentru CNE nian, entaun ita hotu hein hela rezultadu ida-ne’e,” Don Virgílio hateten.

Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).

Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).

Kandidatu indendente Martinho da Silva Gusmao hetan votu 8,485 (1,31% ), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).

Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).

Jornalista : Nelia Fernandes

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here