Diretór Naionál Asisténsia Sosiál (DNAS), Lucas Tois. Imajen Tatoi/Osoria Marques.

DILI, 28 marsu 2022 (TATOLI) – Lansamentu rejistu ba progama “bolsa da mãe jerasaun foun” sei hahú iha 01 abríl, dehan Diretór Diresaun Nasionál Asisténsia Sosiál (DNAS), Lucas Tois.

“DNAS ho Ministériu Saúde hahú, iha 01 abril tinan ne’e, ita hahú programa bolsa da mãe jerasaun foun ba ita-nia inan-isin rua no labarik sira”, Lucas Tois, hateten ba Agência TATOLI, iha nia knaar fatin Caicoli, Dili, ohin.

Tois hateten, bainhira hlo ona lansamentu automatikamente rejistu hahú no prosesu pagamentu mós la’o ona ka osan hahú tama ba konta bankária inan-isin rua no labarik nian.

Nia hatutan, iha abríl no maiu nia-laran ekipa halo rekurtamentu ba pesoál saúde ne’ebé planea sei koloka ba sentru saúde komunitária no postu saúde inklui ospitál referrál sira iha Munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA).

“Iha fulan rua nia-laran ita kontinua halo preparasaun no oinsá tékniku rekrutamentu liu-liu ita mós fó formasaun ba pesoál rekrutadu sira kona-ba programa ne’ebé mak ita planea ona” nia dehan.

Tuir nia, sentru saúde no postu saúde iha munisípiu tolu ne’e hamutuk 93 entaun ekipa téknika sira tenke preparadu nune’e bele implementa programa ne’e ho di’ak no susesu.

Nia dehan Banku Nasionál Komérsiu Timor-Leste (BNCTL-sigla portugés) mak sei halo tranferénsia osan ba benefisiáriu sira ka liuhosi ajénsia seluk ne’ebé hetan ona sertifikadu legál hosi Banku Sentrál.

Diretór rekorda katak ekipa téknika hala’o ona sensibilizasaun programa refere ba autoridade lokál sira iha munisípiu ne’ebé identifikadu ona hosi Governu, iha semana kotuk no foin remata iha loron 25 abríl liubá ne’e.

Bolsa da mãe jerasaun foun ba faze dahuluk Governu sei fó uluk ba Munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA) depois introdúz fali ba munisípiu seluk to’o tinan 2025. Montante orsamentu ba programa ne’e kuaze milaun $7.

Jornalista : Osória Marques

Editór : Zezito Silva

 

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here