Ministru Turizmu Komérsiu no Indústria, José Lucas do Carmo da Silva, asina nota kontratu ho Diretór Kompañia Haberan Unipesoal Lda, Albino Pinto, hodi hala'o estudu viabilidade ba projetu parke industriál, iha salaun MTKI, kinta (24/03). Imajen TATOLI/Francisco Sony

DILI, 24 marsu 2022 (TATOLI)—Ministériu Turizmu Komérsiu no Indústria (MTKI) hamutuk ho kompañia Haberan Unipesoal Lda, kinta ne’e, asina akordu hodi halo estudu viabilidade ba projetu parke industriál iha suku Ulmera, postu administrativu Bazartete, munisípiu Liquiçá.

Ministru Turizmu Komérsiu no Indústria, José Lucas do Carmo da Silva, konsidera biban ne’e istóriku tebes ba ministériu ne’ebé ho knaar atu halo diversifikasaun ekonomia iha rai-laran liuhosi dezenvolve setór indústria, ne’ebé hatuur ona iha Planu Estratéjiku Dezenvolvimentu Nasionál (PEDN) 2011-2030.

Ministru Turizmu Komérsiu no Indústria, José Lucas do Carmo da Silva. Imajen TATOLI/Francisco Sony

“Prosesu ne’e la’o kleur ona hahú hosi Governu anteriór, ne’ebé ohin to’o ona faze asina akordu atu kompañia bele halo estudu viabilidade iha Ulmera hodi haree posibilidade dezenvolve parke industriál,” Ministru José Lucas, hateten iha salaun ministériu, Bebora.

Hafoin asina akordu, implementasaun estudu viabilidade ho durasaun fulan-haat, hahú abríl to’o ramata.

“Rezultadu ne’ebé MTKI hakarak hetan hosi projetu ne’e mak kompañia halo investigasaun ruma ba rai ne’e, tenke haree fatin ne’e viável ka lae ein termu sustentabilidade no benefísiu ekonómiku,” nia akresenta.

Antes ne’e, liuhosi despaixu Primeiru-Ministru, Taur Matan Ruak, estabelese komisaun interministeriál parke industriál, kompostu hosi Ministériu Finansa, Ministériu Justisa, Ministériu Administrasaun Estatál, Sekretariadu Grande Projetu (SGP), no Komisaun Nasionál Aprovizionamentu (CNA, sigla portugés).

Ministru Turizmu Komérsiu no Indústria, José Lucas do Carmo da Silva, asina nota kontratu ho Diretór Kompañia Haberan Unipesoal Lda, Albino Pinto, hodi hala’o estudu viabilidade ba projetu parke industriál, iha salaun MTKI, kinta (24/03). Imajen TATOLI/Francisco Sony

Nune’e, komisaun interministeriál halo serbisu lubuk ida hanesan prodús ona dekretu-lei rua kona-ba implementasaun parke industriál no jestór parke industriál, ne’ebé submete ona iha Konsellu Ministru, nune’e iha baze legál ba faze preparasaun no implementasaun.

“Bainhira projetu ne’e realiza, hanesan elementu xave ida tanba fatin ne’e sei sai fatin pilotu dahuluk iha areadór Portu Tibar no bele sai atrativu no kompetetivu atu atrai investidór sira hosi rai-laran no rai-li’ur,” Ministru tenik.

Notísia relevante: MTKI sei submete ezbosu implementasaun parke industriál iha Liquiçá

Vantajen hosi projetu parke industriál mak atu loke kampu traballu ba joven ho estimasaun hamutuk 4.000.

Enkuantu, kompañia sei halo estudu viabidade iha rai ektare 50 iha Ulmera, ho kustu $225.735.

“Hosi rai ektare 50, iha uma-kain 37 mak afetadu. Tanba ne’e, komisaun interministeriál sei halo levantamentu dadus hodi halo indemnizasaun,” nia salienta.

Uma-kain afetadu projetu sei presiza tan re-definisaun ba dadus, ne’ebé daudaun iha hela diskusaun ho Ministériu Justisa liuhosi Diresaun Nasionál Terras no Propridade, atu sira bele pronúnsia padraun selu rai.

“Ita aloka verba iha Orsamentu Jerál Estadu (OJE) 2021 hamutuk millaun $1,5 hodi selu indemnizasaun,” Ministru dehan.

Notísia relevante: Orsamentu 2021, MTKI tau importánsia harii parke industriál iha Liquiçá

Ministru Turizmu Komérsiu no Indústria, José Lucas do Carmo da Silva, troka nota kontratu ho Diretór Kompañia Haberan Unipesoal Lda, Albino Pinto, hodi hala’o estudu viabilidade ba projetu parke industriál, iha salaun MTKI, kinta (24/03). Imajen TATOLI/Francisco Sony

Ba kestaun ne’e jornalista tenta entrevista responsável kompañia Haberan, maibé fontes seidauk bele fó komentáriu no prefere bainhira iha rezultadu estudu viabilidade mak foin bele hato’o informasaun.

Iha novembru 2019, liuhosi reuniaun estraordinária Konsellu Administrasaun Fundu Infraestrutura (KAFI) aprova ona proposta MTKI liuhosi Diresaun Jerál Indústria atu halo estudu viabilidade ba parke industriál.

Inisiativa ne’e atu fasilita investidór internasionál no nasionál loke fábrika iha Timor-Leste hodi fó serbisu ba timor-oan sira.

Tuir planu,  konstrusaun ba parke indústria ne’e ho kustu millaun $15, maibé prosesu sei la’o hela ne’ebé sei iha mudansa ba kustu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here