Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 19 agostu 2020 (TATOLI)Iha elaborasaun orsamentu 2021, Ministériu Turizmu Komérsiu no Indústria (MTKI) tau importánsia no konsidersaun hodi prevee orsamentu halo konstrusaun parke Industria iha Liquiçá.

“Kona-ba parke industriál, iha 2020 ne’e ita sei halo preparativu maibé ita sei tau osan ba 2021 ninian atubele komesa konstrusaun”, dehan Ministru Turizmu Komérsiu no Indústria, José Lucas do Carmo da Silva, iha Palásiu Governu, kuarta ne’e.

Antes ne’e iha novembru 2019, liuhosi reuniaun estraordinária Konsellu Administrasaun Fundu Infraestrutura (CAFI, sigla portugés) aprova ona proposta MTKI liuhosi Diresaun Jerál Indústria atu halo estudu viabilidade ba parke industriál iha rai ektare 64 iha área Suku Vatuvou, Postu Administrativu Maubara, Munisípiu Liquiçá.

MTKI iha tinan-2020 halo preparativu no liña kordenasaun entre liña minstériu sira inklui komunidade iha Liquiçá, no autoridade lokál.

“Atu haree parke industriál prosesu sei naruk, tanba ne’e tinan 2020 hahú uluk ho faze preparativu. Agora daudaun sei iha faze prelemináriu, katak halo diskusaun lubuk ida atu haree kondisaun rai, hasoru malu ho autoridade lokál, Ministériu Justisa, Terra no Proriedade, Meiu Ambiente, no entidade relevante seluk. Ami sei hasoru malu lai iha faze ne’e hodi ko’alia kona-ba kestaun ne’e,” nia subliña.

Governu konsidera parke industriál kmportante tanba bele fasilita investidór internasionál no nasionál loke fábrika iha Timor-Leste hodi fó servbisu ba timor-oan sira no sei konstrui hanesan fatin sentrál ne’ebé mak iha sítiu investidór sira ne’ebé sei asesu ba rai, bee inklui eletrisidade.

Tuir planu, konstrusaun parke indústria ne’e kustu millaun $15, maibé sei la’o hela iha diskusaun nia-laran, ne’ebé kustu bele aumenta no hamenus.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here