Ministru Turizmu, Komérsiu no Indústria, José Lucas do Carmo da Silva. Imajen TATOLI/Egas Cristóvão

DILI, 14 jullu 2021 (TATOLI)–Ministériu Turizmu, Komérsiu no Indústria (MTKI) sei submete ezbosu ida ba Konsellu Ministru (KM) atu hetan apresiasaun no aprovasaun hodi fó kompétensia ba implementasaun parke industriál iha Liquiçá. 

“Ami sei lori fali dekretu-lei ida atu konsellu Ministru atu aprova, nune’e bele implementa obra ne’e,” Ministru Turizmu, Komérsiu no Indústria, José Lucas do Carmo da Silva, hateten iha Palásiu Governu, kuarta ne’e.

Iha novembru 2019, liuhosi reuniaun estraordinária Konsellu Administrasaun Fundu Infraestrutura (CAFI, Sigla Portugés) aprova ona proposta MTKI liuhosi Diresaun Jerál Indústria atu halo estudu viabilidade ba parke industriál iha rai ektare 64 iha área suku Vatuvou, postu administrativu Maubara, munisípiu Liquiçá.

Notísia relevante: Governu Hakarak Aselera Estabelesimentu Parke Industriál Iha Liquiçá

Nune’e, hahú tinan 2000, MTKI halo preparativu no koordenasaun entre liña ministériu sira inklui komunidade iha Liquiçá no autoridade lokál.

“Ita iha progresu parke industriál ne’ebé tama ona ba faze indemnizasaun ba rai ho despaixu hosi Primeiru-Ministru,” nia akresenta.

Indemnizasaun rai ne’e, ho baze diskusaun lubuk ida atu haree kondisaun rai, hasoru malu ho autoridade lokál, Ministériu Justisa, Terra no Proriedade, Meiu Ambiente, no entidade relevante seluk.

Nune’e, MTKI tau iha orsamentu 2022 tanba sei iha kontinuasaun programa parke industriál ne’ebé foin inísia.

“Ami foin diskute tetu orsamentál ne’ebé nia montante atu prevee ba planu ne’e seidauk bele fó hatene tanba sei iha diskusaun laran,” Ministru hatutan.

Notísia relevante: KM analiza proposta kriasaun komisaun koordenasaun implementa parke industriál

Primeiru-Ministru, Taur Matan Ruak, husu atu aselera prosesu estabeleseimnetu parke industriál iha área Liquiçá tanba nu’udar planu prioridade ba VIII Governu nian atu ajuda indústria kiik sira.

Governu konsidera inisiativa ne’e importante tanba bele fasilita investidór internasionál no nasionál loke fábrika iha Timor-Leste hodi fó serbisu ba timor-oan sira tanba sei sai sentrál ne’ebé mak iha sítiu investidór sira asesu ba rai, bee inklui eletrisidade,

Tuir planu konstrusaun, kustu parke indústria hamutuk millaun $15, maibé sei iha diskusaun nia-laran, ne’ebé kustu bele aumenta ka hamenus.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here