Ministru Edukasaun Juventude no Desportu, Armindo Maia, halo abertura ezame nasionál iha Eskola Ensinu Báziku Sentrál (EBC, sigla portugés), Farol, segunda (13/12). Imajen/MEJD

DILI, 21 marsu 2022 (TATOLI)—Estudante finalista na’in-21.567 ne’ebé termina ona estudu iha nível Sekundáriu Jerál no Tékniku Vokasionál tinan akadémiku 2021 to’o agora seidauk hetan diploma formál tanba seidauk iha asinatura hosi Diretór Servisu Edukasaun munisípiu Dili.

Iha sorin seluk, Diretór Servisu Edukasaun munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma ne’e uza sira-nia naran, tanba ne’e daudaun Ministériu Edukasaun Juventude no Desportu (MEJD) halo hela aprosimasaun ho eis Diretór Edukasaun munisipál na’in-lima atu asina diploma estudante finalista.

Eis Diretór Servisu Edukasaun munisípiu Dili, Duarte Braganza, hateten, nia parte prontu asina diploma estudante finalista sira, maibé presiza karta formál hosi Komisaun Funsaun Públika (KFP) atu nune’e bele hetan lejitimidade, tanba daudaun nia nu’udar funsionáriu baibain.

“Ha’u hetan ezonerasaun hosi kargu nu’udar Diretór molok realiza ezame nasionál ba estudante sira. Karik ha’u bele asina diploma sira ne’e bainhira hetan despaixu hosi KFP, maibé kuandu laiha despaixu ha’u sei la asina,” Duarte Braganza hateten ba Agência TATOLI via telefónika, segunda ne’e.

Notísia relevante: Estudante finalista 21.567 seidauk hetan diploma formál

Eis Diretór ne’e dehan, loloos ninia mandatu to’o loron 31 outubru 2021 mak foin ramata, maibé seidauk kompleta loron ne’e nia hetan ona ezonerasaun.

“Karik ha’u-nia mandatu antes ne’e kompleta duni ha’u prontu asina, maibé molok ida-ne’e ha’u hetan ona ezonerasaun, oinsá mak ha’u hanesan funsionáriu baibain ida atu asina fali diploma sira. Agora ha’u hanesan eis Diretór ida maka asina fali diploma ba estudante finalista sira, entaun kontra ona lei no komete krime foun ida,” nia tenik.

Tuir Duarte Braganza, antes ne’e nia parte konsege hasoru malu ho Ministériu Edukasaun Juventude no Desportu, Armindo Maia, hodi ko’alia kona-ba kestaun ne’e, maibé to’o agora seidauk hetan resposta.

“Ha’u hasoru malu ona ho Ministru Edukasaun Juventude no Desportu no husu atu haree filafali despaixu ezonerasaun ida ba ha’u no KFP rasik mak bele fó fali despaixu ida mai atu ha’u bele asina, maibé kuandu laiha despaixu ha’u sei la asina. Ha’u hatene eskola ho inan-aman sira hein loos ona. Parlamentu Nasionál simu ona keixa hosi inan-aman sira,maibé seidauk rezolve tanba falta koordenasaun no laiha kapasidade atu hanoin didi’ak molok foti desizaun, ikus mai mosu problema,” nia salienta.

Notísia relevante: Diretór Carlito promete sei halo mudansa ba edukasaun Dili

Antes ne’e, Diretór Administrasaun no Finansa MEJD, Antoninho Pires, deklara katak kona-ba diploma estudante finalista sira nia, parte ministériu entrega hotu ona ba eskola sira.

“Agora estudante sira seidauk simu ne’e parese Diretór sira mak seidauk asina. Agora ein jerál kona-ba diploma laiha problema,” nia tenik.

Iha sorin seluk, Diretór Eskola Ensinu Sekundáriu Jerál Nicolau Lobato, Comoro, Marcos Soares Paicheco, dehan, parte eskola prepara ona estudante sira-nia diploma ona.

“Iha diploma ne’e tau naran Diretór sesante, agora problema ida maka eis Diretór Duarte Braganza lakohi asina ho razaun hakarak hetan despaixu hosi KFP. Entaun difikulta estudante ne’ebé hakarak kontinua estudante iha rai-li’ur inklui mós sira iha rai-laran, tanba universidade sira ezije hela estudante sira-nia diploma,” nia akresenta.

Ba kestaun ne’e, Jornalista Agência TATOLI tenta halo konfirmasaun ho Ministru Edukasaun Juventude no Desportu inklui Koordenadór Unidade Kurríkulu Nasionál, maibé fontes okupadu hela.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here