Diretór Servisu Edukasaun Dili (DSED), Carlito da Silva, simu poder hosi diretór sesante Darte Braganca. Imajen Tatoli/Tomé Amado.

DILI, 22 novembru 2021 (TATOLI)—Diretór Servisu Edukasaun Dili (DSED), Carlito da Silva, relata semana ida-ne’e sei konvoka enkontru internál ho dirasaun sira hodi rona sujestaun molok hala’o servisu atu lori mudansa edukasaun iha munisípiu Dili.

“Ha’u mai atu hamutuk ho imi servisu iha ekipa ida de’it hodi lori edukasaun munisípiu Dili hetan ninia progresu. Ha’u mós mai atu lori ita-nia oan sira hetan ninia futuru ida di’ak. Buat ne’ebé ladi’ak ita hamutuk hadi’a buat ne’ebé di’ak ona ita hamutuk kontinua lori ba oin,”  Carlito da Silva hateten iha ninia serimónia entrega podér (hand over) ne’ebé realiza iha edukasaun Munisípiu Comoro, Dili, segunda ne’e.

Serimónia entrega podér hosi liman ida ba liman seluk ne’e la’ós sira na’in-rua nia planu. Maibé lala’ok demokrasia mak hanesan ne’e, fatin ne’e la permanente ohin nia mai aban nia bele fila-fali, importante mak edukasaun iha munisípiu Dili bele hetan susesu.

“Ha’u hakarak dehan ba ita hotu katak fatin ne’e la permanente. Ohin, ha’u mai, aban ha’u bele fila. Importante mak ita-nia servisu ne’e atu lori susesu ba edukasaun iha munisípiu Dili,” nia hateten. s

Tuir nia, edukasaun mak sai xave ida importante ba futuru nasaun nian ho signifika edukasaun forte Estadu mós sei forte. Tan ne’e presiza lolo liman ba malu atu haree rezultadu iha futuru. Ne’e duni atu alkansa no aselera servisu hotu iha edukasaun Dili, hanesan responsavel edukasaun iha Dili, sei konvoka enkontru internál ida iha Semana ne’e hodi rona diresaun sira ninia hanoin oinsá atu halo mudansa ruma iha Munisípiu Dili.

Nia husu ba dirasaun ne’ebé atu servisu hamutuk ho nia no mós profesór sira katak edukasaun munisípiu Dili atu hetan susesu ema hotu tenke servisu ho fuan no labele rai ódiu ba malu. Ninia lideransa ne’e la’ós atu halo hakfodak ba ema seluk maibé nia mai atu lolo-liman ba malu hodi halo mudansa ba Dili.

Diretór sesante Edukasaun Munisípiu Dili, Duarte Braganza, konsidera mandatu ne’ebé nia simu kle’ur demais tanba tinan lima fulan hitu ne’e la’ós tempu ida badak. Maibé, nia haksolok tanba líider foun ne’ebé mai ne’e mós belun ida-ne’ebé di’ak no bele duni servisu atu lori mudansa ba edukasaun iha Dili.

“Ha’u simu karta ida urjente tebes atu halo serimónia hand over. Maibé ha’u rasik mak husu atu labele urjente tanba ita iha dignidade governativa. Ha’u lakohi akontese ida-ne’e, atu ema hateten ita. Tan ne’e mak serimónia ne’e foin bele realiza,” nia dehan.

Antes ne’e, nia husu ba diretór eskola sira atu nafatin hatudu servisu di’ak hanesan baibain, book an lalais, hataan lalais presiza ruma hosi diretór nian.

Jornalista : Tomé Amado

Editór    : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here