DILI, 17 fevereiru 2022 (TATOLI)–Estudante finalista na’in-21.567 ne’ebé termina ona estudu iha nível Ensinu Sekundáriu Jerál no Tékniku Vokasionál tinan akadémiku 2021 seidauk hetan diploma formál.
Diretór Jerál Administrasaun no Finansa hosi Ministériu Edukasaun Juventude no Desportu (MEJD), Antoninho Pires, hateten, parte ministériu fó ona kompeténsia ba Diretór kada eskola atu prepara hela karta deklarasaun hodi fasilita estudante sira bainhira halo inskrisaun iha universidade sira.
“Estudante finalista nia diploma prodús ona no agora distribui ba eskola ida-idak atu prenxe valór sira. Tanba hasoru difikulta iha prosesu distribuisaun diploma maka MEJD husu ona ba Diretór sira atu prepara karta aprovasaun ida hodi garante estudante nia kontinuasaun ba universidade,” Diretór informa ba Agência TATOLI, iha ninia knaar fatin, Villa verde, kinta ne’e.
Notísia relevante: Estudante 50.752 aprovadu ezame nasionál no 18 la pasa
Hafoin eskola prinxe hotu ona valór iha diploma mak estudante sira bele foti hodi submete ba universidade ne’ebé sira halo inskrisaun.
“Estudante finalista tinan akadémiku 2021 ninia kontinuasaun estudu iha instituisaun Ensinu Superiór iha rai-laran sei laiha difikuldade tanba garante ona karta deklarasaun, maibé agora ba sira ne’ebé atu kontinua ba rai-li’ur bele aguenta lai tanba prosesu la kleur,” nia akresenta.
Ba kestaun ne’e, Ministru Edukasaun Juventude no Desportu, Armindo Maia, hateten, kona-ba diploma estudante sira, parte ministériu no eskola rezolve daudaun ona.
Iha sorin seluk, Diretór Eskola Ensinu Sekundáriu Tékniku Vokasionál 28 Novembru Becora, Pedro da Silva Ximenes, konfirma katak parte eskla hetan ona orientasaun hosi MEJD atu garante deklarasaun formál ba estudante finalista sira atu fasilita kontinuasaun estudu iha universidade.
“Deklarasaun ne’e válidu de’it estudante finalista sira ne’ebé eskola iha rai-laran maibé ba rai-li’ur deklarasaun ne’e la vale,” nia tenik.
Jornalista : Tomé Amado
Editora : Julia Chatarina
