Ekipa konjuta PNTL halo operasaun ba motór iha kampaña ikus iha kapitál Dili. Imajen TATOLI/António Dasiparu

DILI, 17 marsu 2022 (TATOLI)— Kampaña ikus iha munisípiu Dili, hahú hosi 14 to’o 16, Komandu Polisia Nasionál Timor-Leste (PNTL) Munisípiu Dili liuhosi ekipa konjunta konsege halo apreensaun ba motorizada hamutuk 300 hosi apoiante kandidatu Prezidente Repúblika períodu 2022 to’o 2027.

“Totál motorizada ne’ebé ita halo apreesaun iha loron tolu ba kampaña loron ikus kandidatu Prezidente Repúblika hamutuk 300,” Komandante Polisia Nasionál Timor-Leste (PNTL), Munsípiu Dili, Superintendente Xefe Henrique da Costa, hateten ba jornalista sira iha Kuartél Jerál PNTL-Caicoli, kinta ne’e.

Notísia relevante:  PNTL halo apreensaun ba motór 112 durante kampaña ikus iha Dili

Ofisial membru PNTL halo operasaun iha kapitál Dili Kinta, 17/3/ 2022. Imajen TATOLI/António Dasiparu

Hosi totál motorizada ne’ebé ekipa konjuta halo apreensaun maoria hosi apoiante kandidatu Prezidente Repúblika númeru sorteiu 14, kandidatu PR númeru sorteiu 6 no kandidatu PR númeru sorteiu 8.

“Tanba motorizada barak liu uza kanu-resin, tula ema liu rua, la tau espellu no laiha karta kondusaun,nune’e  parte ekipa konjuntu lori  motorizada hirak ne’e ba ona Departementu Tránzitu Komandu PNTL Munisipiu Dili atu husu ba ita infratór sira kumpre selu tiha multa hafoin foti sai nian motór,” Komandante ne’e esplika.

Nune’e, Ekipa Konjuta sei kontinua halo pasa revista iha munisípiu Dili no husu ba motorista sira atu kontinua kumpre regra tránzitu liuliu lei kódigu estrada nian.

“Ha’u husu ita hotu kontinua mantein nafatin kumpre ba lei kódigu estrada, nune’e prevene asidente tráfegu,” nia fó hanoin.

Ekipa konjuta kompostu Unidade Espesiál Polisia (UEP), Batallaun Ordem Públiku (BOP), Komandu Espesiál Polísia (COE), Korpu Seguransa Pesoál (CSP), Unidade Patrollamentu Fronteira (UPF), Unidade Polísia Maritima (UPM), Forsa Rezerva (Taskforce) no Tránzitu sei kontinua halo operasaun ba movimentasaun transporte no arma branka iha ámbitu eleisaun prezidensiál, nune’e bele garante seguransa  ba povu sira.

Notísia relevante:  PNTL koloka membru 200 reforsa seguransa iha eleisaun prezidensiál

Jornalista : Natalino Costa    

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here