PNTL halo apreensaun ba motór 112 durante kampaña ikus iha Dili

DILI, 16 marsu 2022 (TATOLI)— Polisia Nasionál Timor-Leste (PNTL), liuhosi Tránzitu Nasionál no munisípiu Dili, halo apreensaun ba motorizada hamutuk 112 hosi apoiante kandidatu Prezidente Repúblika sira tanba viola dekretu-lei kódigu estrada.

“Hahú horishik to’o ohin iha ámbitu kampaña ikus iha Dili, ita halo operasaun hodi halo aprrensaun ba motorizada hosi apoiante kandidatu prezidente Repúblika ne’ebé hala’o kampaña ikus iha Dili hamutuk 112,” Segundu Komandante PNTL, Munisípiu Dili, Superintendente Polísia João Sancho Pires, hateten ba jornalista sira iha bainhira ho ekipa konjuta halo pasa revista ba motorizada sira iha Rotunda Comoro-Dili, kuarta ne’e.

Motorizada sira ne’ebé ekipa tránzitu halo apreensaun maioria hosi Kandidatu PR ho númeru sorteiu 14, José Ramos Horta no kandidatu númeru sorteiu 6, Francisco Guterres Lú-olo, Kandidatu PR Lere Anan Timur no kandidatu seluk tan.

Iha operasaun ne’e, Polísia Tránzitu foku liu ba motór ne’ebé laiha asesoria hanesan xapa mátrikula, laiha espellu motór no uza kanu resin inklui motorista laiha karta kondusaun.

“Ita bele tuir kampaña, maibé ita mós tenke kumpre nafatin ba regra Tránzitu nian ne’ebé maka iha liuliu tau kapasete, asesória motór tenke kompletu hanesan espellu, xapa mátrikulla no lori dokumentu motór no karta kondisaun,” nia sujere.

Nune’e, nia husu ba apoiante no militante kandidatu Prezidente Repúblika (PR) na’in-16 atu nafatin kumpre no respeita regra ne’ebé prevista iha Dekretu-Lei númeru 6/2003, 6 abríl kona-ba Kógidu Estrada nune’e evita asidente tráfegu.

Superintendente ne’e afirma, atu asegura kampaña eleitorál ne’e la’o ho susesu importante liu mak apoiante no militante sira-ne’ebé konduz motorizada tenke uza kapasete, atubele prevene no asegura isin-lolon bainhihira akontese asidente tráfegu ruma iha lurón públiku.

Operasaun ne’e hala’o liuhosi ekipa konjuta kompsotu hosi Unidade Espesiál Polisia (UEP), Unidade Polísia Tránzitu, Unidade Patrollamentu Fronteira (UPF) ne’ebe destakadu iha Aeroportu no hetan apoia hosi Polisia Forsa Reserva (Taskforce) inklui Unidade Polisia Martima.

Daudaun, motorizada hirak ne’ebé Polísia Tránzitu halo apreensaun transporta hotu ona ba iha Komandu Munisípiu Dili atu infratór sira ba selu koima iha Banku Nasionál Komérsiu Timor-Leste (BNCTL,sigla Portugés) hafoin bele hasai motór.

Jornalista: Natalino Costa

Editór       : Florencio Miranda Ximenes