Komandu Jerál Polísia Nasionál Timor-Leste koloka tan membru na’in-200. Imajen/Natalino Costa

DILI, 17 marsu 2022 (TATOLI)— Komandu Jerál Polísia Nasionál Timor-Leste (PNTL) koloka tan membru na’in-200 atu apoia no reforsa seguransa iha sentru votasaun sira iha área rurál iha eleisaun prezidensiál ne’ebé hala’o iha 19 marsu ne’e.

Seremónia dezlokasaun ba membru efetivu PNTL nain-200 ba munisípiu, liuhosi formatura jerál ne’ebé prezide direta hosi Komandante Jerál PNTL, Komisáriu Faustino da Costa, akompaña hosi Segundu Komandante PNTL, Komisáriu Mateus Fernandes no Komandante Operasaun Komandu Jerál PNTL, Superintendente Xefe, Polisia Pedro Belo.

“Ita koloka tan membru efetivu nain-200 atu asegura prosesu eleisaun Prezidensiál 2022-2027 ne’ebe sei hala’o iha 19 marsu tinan ne’e. Membru sira ne’e sei apoia komandu munisipiu sira ne’ebé limitasaun ba rekursu atu fó seguransa ba sentru votasaun 1.800, ne’ebé daudaun ita iha inklui estasaun votu sira,” Komandante Jerál PNTL, Komisáriu Faustino da Costa, hateten ba jornalista sira iha kuartél jerál-Caicoli, kinta ne’e.

Notísia relevante:  PM Taur husu PNTL kontinua asegura kampaña no eleisaun prezidensiál

Kolokasaun membru efetivu 200 ne’e bazeia ba pedidu hosi Komandu PNTL Munisípiu 12 inklui Rejiaun Administrativa Espesiál Oé-Cusse no Ambeno (RAEOA).

“Ita ohin destaka tan ba munisípiu ne’e bazea ba pedidu tanba rekursu iha Komandu Munisípiu la sufiente kada munisipiu konforme pedidu husi Komandu Munisipiu balun ne’ebé husu nain-10, nain-15 to’o 40, hodi reforsa seguransa iha prosesu eleisaun prezidensiál liuliu oinsá atu asegura prosesu kontajen votus, iha nivél munisípiu to’o mai iha nasionál,” nia dehan.

Maske, PNTL iha limitasaun rekursu no fasilidade, maibé PNTL firme nafatin hodi garantia seguransa ba povu no nasaun perante festa demokrásia.

Alende ne’e, Komisáriu Faustino mós kongratula ba membru PNTL iha territóriu nasionál tanba ho esforsu no serbisu di’ak hodi asegura seguransa durante kampaña eleitorál.

“Maske, ita rejista asidente no insidente balun iha kampaña, maibé ita nia atuasaun iha kampaña profisional tebes, Nune’e ita kontinua hatudu servisu di’ak perante eleisaun prezidensiál, hodi povu kontinua fiar ita,” Komisáriu Faustino enkorja.

 Komandante Jerál mós heteten lei permite atu membru sira ezerse nian votu, maibé husu nafatin ba membru sira atu kontinua hatudu profisionalizmu, imparsialidade, neutralidade no loyalidade ba Kamandu sira.

Husu membru sira atu koopera ho autoridade lokál, órgaun eleitorál sira,  nune’e asegura festa demokrásia bele la’o di’ak,  nune’e povu bele ezerse sira nian direitu ho di’ak.

Entertantu efetivu 200 ne’ebé Komandu Jerál PNTL koloka ba munisípiu sira hodi apoia seguransa iha eleisaun prezidensiál kompostu hosi Unidade Espesiál Polisia (UEP), Batallaun Ordem Públiku (BOP), Komandu Espesiál Polísia (COE), Korpu Seguransa Pesoál (CSP), Unidade Patrollamentu Fronteira (UPF), Unidade Polisia Maritima (UPM), membru balun husi Komandu  Jerál PNTL rasik no  Sentru Formasaun Polisia (CFP, sigla portuges).

Notísia relevante:  F-FDTL preparadu apoiu PNTL iha eleisaun PR

Jornalista: Natalino Costa

Editór    : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here