DILI, 17 marsu 2022 (TATOLI)— Prezidente Federasaun Futeból Timor-Leste (FFTL), Francisco Martins da Costa Pereira Jerónimo, simu konvite hosi Federation Football Asosiation (FIFA) atu partisipa kongresu anuál ne’ebé sei hala’o iha iha loron 30 marsu, iha nasaun Qatar.
Lideransa FFTL ne’ebé iha direitu absoluta hodi partisipa iha kongresu ne’e mak Prezidente FFTL, Francisco Martins da Costa Pereira Jerónimo, Sekretáriu Jerál no membru Ezekutivu na’in-ida.
“Ha’u sei sai hosi Dili iha loron 27 marsu hodi ba partisipa kongresu FIFA ba dala-72, ema ne’ebé akompaña ha’u mak Sekretariu Jerál no ezekutivu na’in ida,” Prezidente FFTL Francisco hateten ba Agência TATOLI via rede sosiál, kinta ne’e.
Notísia relevante: Francisco Jerónimo kontinua hetan fiar ba Prezidente FFTL
Iha kongresu ne’e sei partisipa hosi federasaun futeból hotu iha mundu no iha diskusaun ruma ba regulamentu FIFA nian Timor-Leste sei iha direitu atu ezerse votu.
Alende ne’e,iha mós ajenda balun hodi halo diskusaun espesífiku ho Timor-Leste kona-bá dezenvolvimentu futeból país ne’e nian.
Notísia relevante: Kongresu FFTL dahitu, SEJD louva Francisco Jerónimo tanba futeból iha progresu
Jornalista : Hortencio Sanchez
Editór : Florencio Miranda Ximenes
