Federasaun Futeból Timor-Leste realiza kongresu nasionál hodi hili Prezidente no estrutura foun ba períodu 2022 to’o 2026. Imajen/ Hortencio Sanchez.

DILI, 26 fevreiru 2022 (TATOLI)— Governu liuhosi Sekretáriu Estadu Juvntude no Desportu (SEJD), Abrão Nokosiku Saldanha hateten, orgullu no louva ho estrutura Federasaun Futeból Timor- Leste (FFTL) ne’ebé lidera hosi Francisco Martins da Costa Pereira Jerónimo tanba serbisu no esforsu hodi hatudu progresu di’ak  futeból iha Timor-Leste.

“Iha lideransa FFTL ida agora ne’e, ha’u rejista progesu barak, tanba sira konsege halo parseiru di’ak hodi servisu hamutuk ho Governu hodi dezenvolve futeból, ita haree progresu mós iha jogu AFF nia ekipa U-23 tama to’o semi finál mak lakon, maibé lakon ho penalidade la’ós jogu ne’e hatudu progresu di’ak hosi estrutura ida agora ne’e,” SEJD Abrão hateten iha ámbitu abertura kongresu FFTL nian dala-hitu iha Hotel Novo Turismo Dili, sábadu ne’e.

Sekertáriu Estadu Joventude no Desportu (SEJD), Abrão Saldanha. Imajen Tatoli/Antonio Dasiparu

Nune’e,  iha kongresu ne’ebé hala’o atu hili estrutura foun,  SEJD  husu atu mantein servisu hamutuk nafatin ho Governu hodi lori futeból ba oin tanba daudaun hahú hatudu progesu ne’ebé di’ak.

Alende ne’e, SEJD mós husu mós ba estrutura foun kuandu kaer FFTL labele kahur ho polítika maibé haree no foku ba futeból.

“Iha futeból ita labele kahur ho politika, se la’e ema hatama golu ba ita nia ekipa tanba ita preokupa mak polítika la preokupa fali ho bola,” Governante ne’e fó hanoin.

Kongresu ne’e partisipa hosi kongresista hamutuk assosiasan 19 ne’ebé eziste iha Timor – Leste.

Assosiasaun hirak ne’e mak assosiasaun futeból iha munisípiu 12 inklui Rejiaun Administrativa Espesiál Oé-Cusse no Ambeno (RAEOA) hamutuk 14, assosiasaun arbitrajen, juvenÍl, treinadór, klube rua  MAK primeira divizaun no segunda divizaun, futsál no asosiasaun futeból femenino.

Iha kongresu ne’e partisipa hosi kandidatu na’in tolu mak hanesan Francisco Jerónimo, Francisco Kalbuadi Lay no Nilton Gusmão

FFTL seidauk halo programa balun

Iha biban hanesan, Prezidente Federasaun Futeból Timor-Leste (FFTL), Francisco Jerónimo rekoñese durante mandatu konsege halo servisu balun liuliu dezenvolvimentu futeból iha Timor-Leste, maibé buat balun mós seidauk halo.

Prezidente FFTL, Francisco Martins da Costa Pereira Jerónimo. Imajen TATOLI/Francisco Sony

“Ha’u agradese tebes tanba ohin mandatu ikus ba ami, durante tinan haat buat balun mak ita halo ona, balun la konsege halo, buat sira halo ona mak prepara ita nia rekursu hanesan treinadór, arbitrajen, no ita nia jogadór sira konsege halo reprezentan Timor-Leste iha mundu, buat sira ne’e la’ós ha’u mesak mak halo, maibé ho estrutura hotu servisu hamutuk no konta ho ema hotu nia kontribuisaun,” Prezidente F-FTL ne’e akresenta.

Notísia relevante:Kalbuady, Francisco no Nilton hahú kompleta dokumentu kompete ba Prezidente FFTL

Progama balun ne’ebé seidauk halo, Prezidente FFTL ne’e dehan hanesan infrastrutura iha nivél nasionál no munisípiu, nune’e husu ba estrutura foun mai bele kontinua servisu ne’ebé iha atu lori futeból iha Timor -Leste ba oin.

Entretantu, rezidente atuál Francisco Jerónimo sai vensedór ho votus 11 bainhira kompete ho adversáriu membru Komité Ezekutivu FFTL, FIlomeno Fernandes ne’ebé hetan de’it votus 3 no Prezidente Ezersísiu FFTL períodu 2017-2018, Osorio da Costa Florindo ho votus 3.

Prezidente Francisco hili hosi Kongresista  iha kongresu datoluk hosi Asosiasaun Futeból Munisíspiu 13 nomós Asosiasaun Arbitrajen, Asosiasaun Futeból Femenina no Asosiasaun Treinadór.

Kada asosiasaun reprezenta de’it ema ida hodi vota ba kandidatu hirak ne’e, ezeptu vota ba vise prezidente FFTL no membru Komité Ezekutivu FFTL, tanba bazeia ba estatutu hosi FFTL rasik.

Iha biban ne’e, kongresista sira eleje mós vise prezidente FFTL no membru sira ba Komité Ezekutivu FFTL nian maka hanesan Falur Rate Laek (primeiru vise prezidente FFTL), Aleixo da Silva Gama “Cobra” (segundu vise) no Germano A. J. da Silva (terseiru vise), Ángelo Lopez (membru Komité Ezekutivu FFTL), Augusto Henriques (membru), Henrique da Costa (membru), Faustino Godinho da Costa (membru), Maria Terezinha da S. Viegas (membru), Simão F. Piedade Babo (membru), Ricardino Sarmento dos Reis (membru).

Entretantu, Eis Sekretáriu Estadu Komunikasaun Sosiál, Nélio Isaac Sarmento kontinua asume kargu nu’udar Sekretáriu Jerál FFTL tanba indika hosi Prezidente foun FFTL, Francisco Jerónimo.

Kongresista sira iha oportunidade ne’e eleje mós Eis Prezidente FFTL, Francisco Kalbuadi Lay sai prezidente honorer, enkuantu Osorio da Costa Florindo no Filomeno Fernandes nu’udar membru honorer.

Notísia relevante: Francisco Jerónimo sei re-kandidata ba prezidente FFTL 2022-2026

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here