DILI, 26 fevereiru 2022 (TATOLI)— Francisco Martins da Costa Pereira Jerónimo kontinua hetan fiar hosi asosiasaun nain-11 hodi re-eleitu ba Prezidente Federasaun Futeból Timor-Leste (FFTL) ba períodu 2022-2026.
Liuhosi Kogresu nasionál ba dahitu ne’ebé realiza iha Hotel Novo Turismo, sabadu ne’e, Francisco Jerónimo re-eleitu ba Prezidente FFTL tanba hetan konfiansa liuhosi vota sekretu hosi assosiasan futeból hamutuk na’in-11 no Nilton Gusmão hetan votu 10. Hosi asosiasaun hamutuk 21.
Notísia relevante: Kongresu FFTL dahitu, SEJD louva Francisco Jerónimo tanba futeból iha progresu
Kandidatu ne’ebé kompete iha votasaun ronde primeiru mak na’in-tolu hanesan Francisco Jerónimo, Francisco Kalbuadi Lay no Nilton Gusmão.
Iha votasaun primeiru Francisco Jerónimo hetan votu sia, Franscisco Kalbuadi Lay lima no Nilton Gusmão hitu.Nune’e hakat ba ronde segundu kandidatura Francisco kalbuadi Lay rezigna-an hodi entrega de’it ba kandidatu Francisco Jerónimo no Nilton Gusmão mak kompete.
Ho nune’e Francisco Jerónimo re-elitu ba Prezidente FFTL no Xefe Estadu Maiór FALINTIL-Forsa Defeza Timor-Leste (F-FDTL), Tenente Jeneral Falur Rate Laek mak sai vise prezidente liuhosi vota aklamasaun afavór 20 no abstensaun ida.
Alende ne’e, iha votasaun ba terseiru nian hodi hili membru komite ezekutivu estrutura foun hosi kandidata na’in rua mak Engracia Fernandes no Maria Terezinha Viegas ne’ebé hili direita hosi assosiasaun 21 ho votasaun sekreta.
Hosi rezultadu votasaun kandidatura Engrasia mak manán hodi sai hanesan membru komite ezekutivu feto ho votu 13 no kandidatu Maria hetan votu neen.
Iha votasan datolu ba membru komite ezekutivu hamutuk kandidatura na’in ualu mak hanesan, Aniceito Berlelo, Angelo Lopes, Agosto Henrique, Faustino Godinho, Henrique da Costa, Ipolito Soares, Marito Belo no Recardinho dos Reis. Votasaun ba membru hirak ne’e halao sekretu ho nune na’in haat de’it mak pasa.
Ho nune’e Aniceto hetan votu 11, Angelo ualu, Agosto 13, Faustino 12, Henrique 14, Ipolito hitu, Marito 11 no Ricardino ualu.
Hosi rezultadu ne’e na’in tolu hanesan Agosto, Faustino no Henrique mak manán automatikamente, enkuantu Aniceto no Marito hakat ba ronde dala-rua tanba votu hanesan tuir kritéria membru kómite ezekutivu mane tenke ema na’in haat de’it.
Iha rezultadu ronde segundu nian Marito mak manán ho votu 12 no Aniceto tenke hela ho votu 9, nune Marito mak tama iha membru komite ezekutivu hodi kompleta ema na’in haat.
“Agradese ba delegadu sira fó ona komfiansa ba ha’u, haú nia pograma importante mak hanesan futeból juveníl la’o iha munisípiu kada tinan, treinamentu ba juveníl hosi tinan 8 to’o 12 tenke la’o makas, formasaun ba árbitrajen iha nasionál no munisípiu tenke kontinua, kontinua apoia liga ne’ebé iha ona hanesan jogu terseiru divizaun la hala’o tan iha Dili ba halao iha munispiu mak mai kompete iha segundu divizaun iha Dili,” Prezidente FFTL, Francisco Martins da Costa Pereira Jerónimo hateten hafoin hetan fiar hodi re-eleitu ba lidera FFTL.
Tanba ne’e, Prezidente F-FTL ne’e husu ba ema hotu atu nakloke ba malu hodi bele lori futeból ba oin.
“Liga feto la’ós iha ne’e de’it tenke lori to’o iha munisípiu hotu atu inan feton sira bele kompete hotu, kopa FFTL sei fó ba Munisipiu sira mak compete,la’ós klube iha primeira divizaun no segunda divizaun mak kompete, maibé fó oportunidade ba joven sira iha munisípiu mak kompete,” nia afirma.
Atuál Ministru Asuntu Parlamentár no Komunikasaun Sosiál ne’e, hatutan iha nia mandatu tau importansia ba nivél infraestrutura tanba daudaun ne’e infrastrutira futeból seidauk di’ak.
“Iha mandate tinan haat ne’e sei fó prioridade ba hadi’a kampu futeból sira ho di’ak tuir estandar internasionál ba ema hotu,” nia kompromete.
Notísia relevante:Kalbuady, Francisco no Nilton hahú kompleta dokumentu kompete ba Prezidente FFTL
Jornalista : Hortencio Sanchez
Editór : Florencio Miranda Ximenes
