Fatin ba debate kandidatu Prezidente Repúblika períodu 2022-2027 iha Hotel Novo Turismo, Dili, tersa (15 marsu 2022). Imajen/Espesiál.

DILI, 15 marsu 2022 (TATOLI)–Debate públiku entre Prezidente Repúblika 2022-2027 ne’ebé mak realiza hosi Komisaun Nasionál Eleisaun (CNE) hetan lamentasaun hosi prezidente ekipa susesu kandidatu balun, tanba la fó satisfasaun balun ba telespetadór sira iha rai-laran no rai-li’ur.

Notísia Relevante: Debate para dalan klaran, Prezidente CNE dehan normál

Prezidente Ekipa Susesu ba kandidatura Prezidente Repúblika José Ramos Horta, Tomas Cabral, lamenta tebes ba Komisaun Nasionál Eleisaun (CNE, sigla portugés) nia preparasaun ba iha preparasaun debate publiku entre kandidatu Prezidente Repúblika 2022-2027.

“Ha’u konsidera aktu ida-ne’e nu’udar violasaun direitu públiku ne’ebé grave ida, tanbá ida-ne’e nu’udar aktu Estadu nian ida. Ba ami, ida-ne’e monu iha ami-nia kandidatura atu hatán perguntas, maibé hetan intervensaun hosi moderadór, nune’e mak labele kontinua hatán ba pergunta. Há’u husu ba Estadu atu hadi’a ida-ne’e, jestór mak Estadu tanbá ne’e mak tenke haree ba situasaun ida-ne’e.” Tomas Cabral hateten ba Agência Tatoli, bainhira partisipa iha sesaun dahuluk debate públiku ne’ebé mak realiza iha Hotel Novo Turismo, Díli.

Nia husu Estatu atu kria debate públiku tenke kria kondisaun ida-ne’ebe mak di’ak, tanba Estadu iha posibilidade tomak atu bele tau internet ninia bmega ka binoit boot ida iha ne’e, nune’e transmisaun direta ba programa debate públiku ne’e bele hakonu públiku nia direitu ba informasaun.

“Ba ami lamenta tebes ho transmisaun direta ida-ne’e, tanba iha debate publiku ne’e kandidatu na’in-16 tuir loloos atu hato’o sira-nia programa ho objetivu atu hanorin ba ita-nia eleitór sira atu fó sira nia votu ida ba kandidatu ida-ne’ebe mak sira hakarak eskolla,” nia dehan.

Nune’e mós, Prezidente Ekipa Susesu ba kandidatu PR númeru sorteiu ualu (8), Hugo Maria Fernandes, salienta tan katak horisehik iha primeiru enkontru ho CNE, hato’o parte barak liu-liu kona-ba preparasaun téknika sira to’o ikus sai realidade.

“Ha’u-nia preokupasaun nian ne’ebé mak iha horisehik ne’e ohin sai realidade katak iha fallansu sira-ne’ebe mak antes ne’e, sira la konsege rezolve, ikus mai ohin kalan sai realidade,” nia dehan.

Nia salienta tan katak iha debate publiku nee ho kustu neebe mak boot, maibe la atinje ninia objetivu final.

Nia mos lamenta ho perguntas balun hosi CNE maiória laiha relasaun ho kompeténsia Prezidente Repúblika nian no haree katak husu fali pergunta balun kabe fila-fali ba Exekutivu nian.

Nune’e mós, kandidatura Prezidente Repúblika, Virgilio da Silva Guterres ‘Lamukan’, hateten katak nia parte lakohi atu halo uluk julgamentu ba kestaun téknika ida-ne’e.

“Foin lalais, há’u prefere liu salaun Laline Larigutu iha espasu ida-ne’ebe mak di’ak no luan duké iha Hotel Novo Turismo,” nia dehan.

Notísia Relevante: Prezidente RTTL, E.P protesta CNE hili empreza privada realiza debate ba kandidatu PR

Jornalista : Domingos Piedade Freitas

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here