Xefe Departamentu Relasaun Públika Komandu Jerál Polisia Nasionál Timor-Leste, Superintendente Xefe Armando Monteiro, Imajen Tatoli/Natalino Costa

DILI, 07 marsu 2022 (TATOLI)- Xefe Departementu Relasaun Públiku Komandu Jerál Polísia Nasionál Timor-Leste (PNTL), Superintendente Xefe Armando Monteiro, informa PNTL kontinua buka tuir suspeitu sona mate António de Jesus, iha segunda (7/2), tuku 3:00, matugrada, iha área Elemloi, aldeia Delta 3, suku Comoro, postu administrativu Dom Aleixo, Munisipiu Dili.

“Ita nia parte intelejénsia sei kontinua nafatin koleta informasaun hosi lokál krime no hosi komunidade ne’ebé maka hela iha área ne’eba atubele kolabora no fó informsaun loloos,   nune’e  ita bele identifika lalais autór ne’ebé deskonfia halakon ita nian sidadaun  António de Jesus nia vida,” Portavóz Komandu Jerál PNTL ne’e, hateten ba jornalista sira liuhosi konferénsia imprensa iha Kuartél Jerál PNTL, Caicoli, segunda ne’e.

Notísia relevante: PNTL kaptura autór na’in-lima ne’ebé deskonfia oho António de Jesus

Kazu hamate António de Jesus, nia dehan PNTL seidauk detein ema ida hanesan suspeitu prinsipál tanba daudaun sei iha hela faze investigasaun no buka tuir autór ba krime ómesidu ne’e.  

“Ita seidauk detein suspeitu prinsipál ba kazu ne’e, ita sei kontinua hela buka tuir autór ne’ebé maka halo ita nian sidadaun ne’e lakon vida iha Elemloi. Maske antes ne’e halo ona identifikasaun ba família matebian no ema sira ne’ebé besik na’in-11,”Superintendete Xefe Armando Monteiro afirma.

Notísia relevante:  Kazu hamate António, PNTL halo identifikasaun ba ema nain-11

Portavóz PNTL ne’e dehan, hosi ema nain-11  ne’ebé mak halo identifikasaun ne’e, sei iha faze dezenvolve hanesan informasaun, nune’e hodi buka tan informasaun balun seluk hodi kompleta atu bele identifika lalais autór prinsipál ba kazu ne’e.

Entretantu, kazu Bebonuk ne’ebé akontese iha loron 8 fevereiru ne’ebé hamate funsionáriu media Timor Post, Levi Gomes, mós iha hela prosesu investigasaun laran.

“Ha’u hanoin kazu Bebonuk ne’e hanesan  iha ona prosesu nia laran. Rezultadu otopsia ba ema nain-rua ne’e segredu hosi prosesu ninian. Só iha tribunál mak bele hatene no lee sai kona- ba rezultadu  ida ne’e. PNTL so kompleta dokumentu ba prosesual de’it,” nia akresenta.

Notísia relevante:  Deskonfia Levi Gomes “oho-an” iha fahi luhan 

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here