Komandante PNSIK Superientendente, José Maria Neto Mok. Imajen Tatoli/Francisco Sony

DILI, 08 fevereiru 2022 (TATOLI)— Polisia Nasionál Timor-Leste (PNTL) halo identifikasaun ba ema na’in-11, kona-ba kazu hosi ema deskoñesidu hamate António de Jesus, iha área Elemloi, aldeia Delta 3, suku Comoro, postu administrativu Dom Aleixo, Munisípiu Dili, iha loron segunda (07/02), tuku 3:00, matrugada.

“Ami seidauk ka’er ema ne’ebé mak sai hanesan suspeitu prinsipál ba kazu ne’e, maibé atu dehan de’it ami hahú hosi horiseik bolu ona ema nain-11 inklui matebian nia feen, oan no família vítima sira seluk atu halo identifikasaun,” Komandante Polísia Nasional Servisu Investigasaun Kriminál (PNSIK), Superintendente Xefe Polisia José Maria Neto Mok, hateten ba Agência TATOLI via telefónika, tersa ne’e.

Objetivu halo identifikasaun ba ema hirak ne’e atubele buka tuir suspeitu prinsipál ne’ebé sona mate António de Jesus. Tanba suspeitu prinsipál ba kazu omesidiu ne’e seidauk ka’er.

Nune’e,  lori komandu PNTL nia naran rejeita informasaun ne’ebé espalla iha rede sosiál katak PNTL ka’er ona suspeitu prinsipál hosi kazu omesídiu ne’e.

“Informasaun dehan PNTL ka’er ona suspeitu prinsipál ne’e bosok tanba ema seluk mak naran tau arbiru ka inventa hodi públika katak PNTL kaer ona,” Komandante PNSIK ne’e rejeita.

Família ejize buka tuir suspeitu 

Iha sorin seluk, Reprezentante Família matebian, Ledro da Silva, hateten matebian António de Jesus nia mate isin halo ona otopsia no daudaun parte família prepara atu lori ba nia  moris fatin  Aldeia Aidabaslalan,Suku Hatas, Posto administrativo Atabae, munisípiu Bobonaro.

“Ami seidauk hatene nia (matebian António de Jesus) nia rezultadu otopsia tanba ospitál entrega ona ba polisia ho razaun segredu justisa, nune’e labele fó sai,” nia afirma.

Tanba ne’e, nia husu ba PNTL atu kontinua halo investigasaun hodi buka tuir suspeitu ne’ebé halakon ona vitíma nia vida.

“Ami ejize nafatin Polísia atu kontinua buka suspeitu hodi ka’er atubele responsabiliza aktu ne’ebé nia halo tuir dalan justisa,” nia husu.

Hafoin halo autopsia parte HNGV entrega mate-isin António de Jesus, ohin, tuku 13:40 otl ba família hodi halo seremonia funebre.

Tuir observasaun Jornalista TATOLI iha tereñu nota katak bainhira lori sai mate iha mortuáriu HNGV hetan akompanamentu hosi PNTL to’o matebian nia moris-fatin.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here